راولپنڈی پچ کے بعد آئی سی سی نے بھارت اور سری لنکا کے مابین ٹیسٹ میچ کے لئے استعمال ہونے والی پچ کو بھی ناموزوں قرار دے دیا۔

بنگلور کی پچ بھارت اور سری لنکا نے مابین ہونے والے پنک بال ٹیسٹ میں استعمال کی گئی تھی۔

میچ ریفری جواگل سری ناتھ نے پچ کو خراب قرار دیتے ہوئے کہا کہ وکٹ بیٹ اور گیند میں متوازن مقابلے کے لئے نامناسب تھی۔

اس پچ پر میچ کا فیصلہ بھارت کی فتح کی صورت میں صرف تین دن میں ہی ہو گیا تھا، جبکہ میچ کے دوران گرنے والی 39 وکٹوں میں سے 26 وکٹیں اسپنرز کے نام رہی تھیں۔

اس پچ پر گیند پہلے دن سے ہی زیادہ گھومنا شروع ہو گئی تھی اور ہر گزرتے سیشن کے ساتھ اس میں تیزی آنا شروع ہو گئی تھی۔

میچ ریفری جواگل سری ناتھ نے اپنی رپورٹ میں لکھا ہے کہ نامناسب پچ کے تیور پہلے دن ہی سامنے آ گئے تھے ، پہلے دن 16 وکٹیں ، دوسرے دن 14 اور پھر تیسرے دن 9 وکٹیں گریں۔

واضح رہے کہ اس پنک بال ٹیسٹ میچ کے بہترین پلئیر کا اعزاز حاصل کرنے والے شریاس آئیر نے بھی اس پچ پر عدم اطمینان کا اظہار کیا تھا۔

جواگل سری ناتھ نے پچ رپورٹ آئی سی سی کو بھیج دی تھی ، امکان یہی ہے کہ چنا سوامی گراؤنڈ کو ایک ڈی میرٹ پوائنٹ کا سامنا کرنا پڑ سکتا ہے۔

واضح رہے کہ اگر کسی گراؤنڈ کو پانچ ڈی میرٹ پوائنٹس ملتے ہیں تو اس گراؤنڈ پر ایک سال کے لئے بین الاقوامی میچز کی میزبانی معطل کر دی جاتی ہے۔

آئی سی سی قوانین کے مطابق ایک ڈی میرٹ پوائنٹ پانچ سال تک نافذالعمل رہتا ہے۔