شہر کراچی میں رمی کی شدت میں اضافہ ریکارڈ کیا گیا ہے جو کہ 37.1 ڈگری سینٹی گریڈ تک پہنچ گیا ہے۔

 اس حوالے سے محکمہ موسمیات کا کہنا ہے کہ اس وقت شہر بھر میں گرمی کی شدت 39 ڈگری سینٹی گریڈ تک محسوس کی جارہی ہے۔

محکمہ موسمیات کے مطابق شہر کراچی کا موجودہ درجہ حرارت 37.1 ڈگری سینٹی گریڈ ہے جبکہ ہوا میں نمی کا تناسب 15 فیصد ہے۔

خیال رہے کہ گزشتہ روز جاری ہونے والے اعلامیے کے مطابق شہر کراچی میں  آئندہ 3 روز تک گرمی کی شدت میں اضافہ ہوگا اور 1 اپریل تک شہر گرمی کی لپیٹ میں رہے گا۔

محکمہ موسمیات چیف میٹرولوجسٹ نے بتایا کہ کل سے شہر کا درجہ حرارت 41 ڈگری سینٹی گریڈ تک پہنچنے کا امکان ہے، مغرب سے گرم اور خشک ہوائیں چلیں گی جب کہ دن کے اوقات میں سمندری ہوائیں معطل رہینگی۔

علاوہ ازیں آئندہ بارہ گھنٹوں کے دوران ملک کے بیشتر علاقوں میں موسم زیادہ تر گرم اور خشک رہنے کا امکان ہے۔

محکمہ موسمیات کے مطابق اسلام آباد، بالائی پنجاب، سندھ اور بلوچستان میں گرد آلود ہوائیں چلنے کے ساتھ گرم موسم کا بھی امکان ہے تاہم تاہم خطہ پوٹھوہار، مری، گلیات، بالائی خیبرپختونخوا کشمیر اور گلگت بلتستان میں چند مقامات پر ہلکی بارش اور گرج چمک کے ساتھ موسم ابر آلود رہنے کا امکان ہے۔