امریکی ریاست کیلیفورنیا کی ایک خاتون مبینہ طور پر پانچ دن کے اندر دو بار حاملہ ہو گئیں، حیرانی کیی بات یہ ہے کہ دونوں بچے جڑواں نہیں لیکن پھر بھی ایک ہی دن پیدا ہوئے۔

سان پابلو، کیلیفورنیا سے تعلق رکھنے والی 25 سالہ اوڈالس مارٹینز کو ڈاکٹروں نے بتایا کہ ان کے بچے پانچ دن کے وقفے سے پیدا ہونے کی امید ہے جبکہ وہ تکنیکی طور پر جڑواں بھی نہیں ہیں۔

اس خوشخبری سے قبل اوڈالس اسقاطِ حمل کے تکلیف دہ مرحلے سے گزر چکی تھیں۔

اوڈالس نے کہا کہ جب وہ اپنا پہلا اسکین کرانے گئیں تو خوفزدہ تھیں کہ انہیں دوبارہ بری خبر سنائی جائے گی۔

“انہوں نے بتایا کہ میں خوفزدہ تھی کیونکہ مجھے بتایا گیا تھا کہ کوئی دل کی دھڑکن نہیں ہے، میں سارا وقت بے چین تھی۔

 اوڈالس نے کہا کہ جب ڈاکٹر اندر آئے تو میں خود کو کسی بھی بری خبر کے لیے ذہنی طور پر تیار کرنے کی کوشش کر رہی تھی، لیکن جب ڈاکٹر نے پہلے بچے کی دل کی دھڑکن سنی تو میں خوشی سے رو پڑی۔

لیکن پھر ڈاکٹر نے انہیں ایک انتہائی حیران کن خبر سنائی، کہ وہ ایک نہیں بلکہ دو بچے ہیں، اور اوڈالس کا ایک ہی ہفتے میں مختلف اوقات میں دو بار حمل ٹھہرا ہے۔

انہوں نے کہا کہ خبر سن کر میں خوشی سے رو پڑی، مجھے ایسا لگا جیسے پہلا بچہ جسے ہم کھو چکے ہیں وہ میرے ساتھ کمرے میں ہے اور کہہ رہا ہے کہ اب سب ٹھیک ہو جائے گا۔

دوہرا حمل کیا ہے؟

دوہرا حمل، جسے بصورت دیگر “سپرفیٹیشن” کے نام سے جانا جاتا ہے، انتہائی نایاب ہے۔

حقیقت یہ ہے کہ ایک عورت کا کتنی بار حاملہ ہوسکتی ہے، یہ بتانے کے لیے اعداد شمار کی کمی ہے۔ جب کہ کچھ ماہرین کا تو یہ بھی ماننا ہے کہ ایسا انسانوں میں ممکن ہی نہیں۔

سپرفیٹیشن سے مراد ایسی صورت حال ہے جہاں ایک عورت پہلے سے جاری حمل کے دوران دوسری بار بھی حاملہ ہو جاتی ہے۔

2017  کے ایک مطالعہ کے مطابق، طبی لٹریچر میں سپرفیٹیشن کے 10 سے کم انسانی معاملات کی اطلاع دی گئی ہے۔

مارٹینز کے اب دو صحت مند بچے ہیں، جن کا نام لیلو اور امیلڈا ہے، جو ایک ہی دن یعنی 10 اگست 2021 کو پیدا ہوئے۔

پیدائش کے وقت دونوں کا وزن بالترتیب چھ پاؤنڈ، 12 اونس، اور سات پاؤنڈ، تین اونس تھا۔

مارٹنیز کا کہنا ہے کہ مجھے لگتا ہے یہ کوئی معجزہ ہی ہے کہ میں نے اس دوہرے حمل کا تجربہ کیا۔

اگرچہ دونوں بچے جڑواں نہیں ہیں، لیکن دونوں میں حیرت انگیز مشابہت ہے۔