ایک بہادر آدمی نے گھر میں گھُسے ڈاکوؤں کا اکیلے مقابلہ کر کے انہیں بھاگنے پر مجبور کر دیا۔
غیر ملکی میڈیا رپورٹ کے مطابق انگلینڈ کے شہر مانچسٹر میں اتوار کی رات تین نقاب پوش ڈاکو ایک گھر میں گھسے، یہ تینوں ملزمان چاقوؤں اور ایک ہتھوڑے سے لیس تھے۔
تاہم بہادر آدمی نے اپنے گھر میں گھسنے والے ان 3 مسلح ڈاکوؤں سے تن تنہا مقابلہ کیا اور انہیں بھاگنے پر مجبور کردیا۔
رپورٹ کے مطابق ڈاکوؤں نے گھر کے اندر داخل ہونے کیلئے اینٹ اٹھاکر کھڑکی کے شیشے پر دے ماری اس ٹوٹی ہوئی کھڑکی سے ملزمان گھر میں داخل ہوگئے۔
ڈاکوؤں نے گھر میں داخل ہوکر باورچی خانے سے ایک چاقو اٹھایا اور واردات کرنے کے لئے اوپری منزل کی جانب جانے لگے جہاں بچے سو رہے تھے۔ تاہم ڈاکوؤن کے اوپر پہنچنے سے پہلے ہی بچوں کے والد نے ملزمان کو دبوچ کر قابو میں لے لیا اور ان کے ڈکیتی کے منصوبے کو ناکام بنا دیا۔

مذکورہ بہادر شخص نے میڈیا کو بتایا کہ جب وہ اوپر کمرے کے باتھ روم میں تھا تو کسی کی گھر میں گھسنے کی آہٹ سن کر جلدی سے باہر آیا تو اس نے دیکھا کہ 3 نقاب پوش ملزمان اوپر آنے کی کوشش کر رہے ہیں اس شخص نے بہادری کا مظاہرہ کرتے ہوئے ایک لڑکے کے اوپر چھلانگ لگائی اور ایک کے کندھے پر لات دے ماری۔
اس شخص نے مزید بتایا کہ ملزم نے مجھے اپنی ٹانگوں میں جکڑ لیا تھا لیکن ایک جھٹکے سے اس نے خود کو آزاد کروالیا، شور شرابےکی آواز سے اس شخص کی بیوی بھی جاگ اُٹھی اور اس کی بیوی نے اس دوران نے اپنے شوہر کو بیس بال کا بیٹ دیا جس سے اس نے ملزمان کی پٹائی کر ڈالی۔
تاہم شور شرابے کی آوازوں سے ان کے پڑوسی آئے اور دروازے پر دستک دی اور ان کا دھیان بھٹک گیا جس کا فائدہ اُٹھا کر ڈاکو فرار ہونے میں کامیاب ہوگئے۔