مسجد کوچہ رسالدار خودکش حملے کا مقدمہ درج کرلیا گیا ہے جب کہ تفتیشی ٹیم نے شواہد کی روشنی میں 2 مشتبہ افراد کو حراست میں لے لیا ہے۔

لیڈی ریڈنگ اسپتال میں دھماکے کے مزید 5 زخمی دم توڑ گئے ہیں، جس کے بعد خودکش حملے میں جاں بحق افراد کی تعداد 62 ہوگئی ہے۔

ترجمان لیڈی ریڈنگ اسپتال کا کہنا ہے کہ ایل آر ایچ میں دھماکے کے 37 زخمی زیر علاج ہیں۔

زیرعلاج زخمیوں جن میں سے 5 کی حالت تشویش ناک ہے جب کہ ایک کو فارغ کر دیا گیا ہے۔

دھماکے کے دوسرے روز بھی شہر کی فضا سوگوار ہے، تاجر تنظیموں کی جانب سے کئے گئے اعلان کے بعد شہر کی اہم مارکیٹیں اور بازار بند ہیں۔

شہر کے مختلف علاقوں میں جاں بحق افراد کی نماز جنازہ اور تدفین کا سلسلہ بھی جاری ہے۔

اب تک 27 افراد کو سپرد خاک کیا جاچکا ہے۔

2 ملزم گرفتار

پولیس اور سی ٹی ڈی کی تفتیشی ٹیم نے خودکش حملے کے زخمیوں کے بیانات قلم بند کیے ہیں۔

پولیس ذرائع کا کہنا ہے کہ تفتیشی ٹیم نے مختلف علاقوں میں سی سی ٹی وی کیمروں میں حاصل ہونے والی وڈیوز کی جانچ پڑتال کی ہے۔

گواہوں کے بیانات اور سی سی ٹی وی وڈیوز سے معلوم ہوا ہے کہ خودکش حملہ آور کو رکشا میں لایا گیا اور اس کے ساتھ 2 دیگر لوگ بھی تھے جنہوں نے خودکش حملہ کی سہولت کاری کی۔

خود کش حملہ آور اور دونوں سہولت کاروں کے خاکے تیار کرلیے گئے ہیں، اس کے علاوہ 2 مشتبہ افراد کو حراست میں بھی لے لیا گیا ہے۔

خودکش حملے کا مقدمہ درج

تھانہ سی ٹی ڈی میں مسجد خودکش دھماکے کا مقدمہ ایس ایچ او تھانہ خان رازق کی مدعیت میں درج کرلیا گیا ہے۔

ایف آئی آر میں دہشت گردی، قتل اور اقدام قتل کی دفعات شامل کی گئی ہیں۔

ایف آئی آر کے متن میں کہا گیا ہے کہ ایس ایچ او تھانی خان رزاق مسجد کی سیکیورٹی کے معائنے کے بعد ساتھ کی گلی میں پہنچا تو اسے فائرنگ کی آواز سنائی دی۔

مقدمے میں کہا گیا ہے کہ ایس ایچ او واپس مسجد لوٹا تو پولیس والے زخمی تھے اور دھماکا ہو چکا تھا۔

ایف آئی آر کے متن میں مزید کہا گیا ہے کہ خودکش حملہ آور نے مسجد میں گھس کر پہلے اندھا دھند فائرنگ کی اور پھر خود کو دھماکے سے اڑا دیا۔