کورونا وبا کے بعد دنیا بھر میں آن لائن میٹنگ اور تدریس میں بہت اضافہ ہوا۔ اس کے لیے نت نئے سافٹ وہیئر اور ہارڈویئر بھی سامنے آئے ہیں۔ اسی ضمن میں “میٹنگ اول پرو” الو کی شکل کا ایک ایسا کیمرہ ہے جو آن لائن میٹنگ کو 360 درجے پر حقیقی انداز میں دکھاتا ہے۔ اس کے علاوہ اگر ایک دفتر میں ہی چار لوگ بیٹھے ہیں تو ان سب کی گفتگو اور ویڈیو ایسے ظاہر کرتا ہے کہ ان پر حقیقت کا گمان ہوتا ہے۔

اسے میز پر رکھا جاسکتا ہے، ٹرائپوڈ سے سہارا دینے کے ساتھ ساتھ، چھت سے بھی لٹکایا جاسکتا ہے۔ ایک الو ازخود گھومتے ہوئے ہر بولنے والی کی ویڈیو آن لائن نشر کرتا رہتا ہے۔ اس کے خاص کیمرے کسی بھی مقام کو گہرائی میں ظاہر کرکے اسے تھری ڈی اور گہرائی میں دکھاتے ہیں۔

دوسری اہم بات یہ  ہے کہ اس میں ایک دو نہیں بلکہ 8 مائیکروفون نصب ہیں جو 18 فٹ دوری سے بھی گفتگو سن سکتے ہیں۔ پھر میٹنگ میں کمپیوٹر پر بیٹھنے کی ضرورت نہیں کیونکہ اس کے اندر ہی ایک اسپیکر بھی نصب ہے۔ دلچسپ بات یہ ہے کہ اسے آن لائن میٹنگ کے تمام سافٹ ویئر یعنی زوم، گوگل ہینگ، ایئرمیٹ اور دیگر مشہور پلیٹ فارم پر یکساں انداز میں استعمال کیا جاسکتا ہے۔

یوایس بی سلاٹ سے جڑنے کے بعد یہ ازخود اس کی طرح گھوم جاتا ہے جہاں سے آواز آرہی ہوتی ہے اور اس کی شاندار ویڈیو آن لائن پلیٹ فارم پر نشر کردیتا ہے۔ اس صلاحیت کے لیے میٹول آول کمپنی نے مصنوعی ذہانت کا سہارا لیا ہے۔ یہ دلچسپ کیمرہ کئی سائز اور ماڈل میں دستیاب ہے۔