وزیر زراعت پنجاب حسین جہانیاں گردیزی نے کہا ہے کہ کپاس کے آئی پی ایم مینول پر عملدرآمد یقینی بنایا جائے۔

تفصیلات کے مطابق صوبائی وزیر زراعت پنجاب حسین جہانیاں گردیزی کی زیر صدارت سول سیکرٹریٹ لاہور میں کاٹن کمیٹی کے پہلے اجلاس کا انعقاد ہوا جس میں انہوں نے کہا کہ کپاس کی بوائی کے ہدف کے حصول کو سو فیصد یقینی بنانے کے اقدامات کئے جائیں۔

وزیر زراعت پنجاب نے کہا کہ کپاس کی گلابی سنڈی کے کنٹرول کیلئے اقدامات یقینی بنائے جائیں ۔

اجلاس میں سیکرٹری زراعت پنجاب اسد رحمان گیلانی نے کہا کہ کپاس کے غیرمعیاری بیج کی فروخت میں ملوث افراد کے خلاف قانون کے مطابق کارروائی عمل میں لائی جائے۔

ان کا کہنا تھا کہ کپاس کی آئندہ فصل کی پیداوار میں اضافےکیلئے بھرپور اقدامات کئے جائیں۔

اجلاس میں ڈائریکٹر جنرل زراعت توسیع ڈاکٹر محمد انجم علی،ڈائریکٹر جنرل ریسرچ ڈاکٹر محمد اختر، ڈائریکٹر جنرل پیسٹ وارننگ ڈاکٹر محمد اسلم  نے  شرکت کی۔

اجلاس میں ڈائریکٹر کاٹن ملتان ڈاکٹر صغیر ،ڈائریکٹر کراپ رپورٹنگ عبدالقیوم اور ڈپٹی ڈائریکٹر نظامت زرعی اطلاعات پنجاب نوید عصمت کاہلوں سمیت دیگر اعلی افسران نے  شرکت کی جبکہ سیکرٹری زراعت پنجاب اسد رحمان گیلانی اور سیکرٹری زراعت جنوبی پنجاب ثاقب علی عطیل نے بھی  اجلاس میں خصوصی شرکت کی۔