نسلہ ٹاورکیس میں بلڈرز اور سرکاری افسران کی قبل از گرفتاری کے معاملے پر مقامی عدالت نےتمام 11 ملزمان کی عبوری ضمانت کی توثیق کردی۔ 

 ڈسٹرکٹ اینڈ سیشن جج شرقی کراچی کی عدالت میں نسلہ ٹاور کی غیر قانونی تعمیرات کے کیس میں مقدمے میں نامزد بلڈرز اور سرکاری افسران کی قبل از گرفتاری کے معاملے پر سماعت ہوئی۔

 ملزمان کی ضمانت کی توثیق کی درخواست پر فیصلہ سناتے ہوئے عدالت نے ملزمان کی عبوری  ضمانت کی توثیق کردی۔

عدالت نے ملزمان کو متعلقہ عدالت میں پیش ہونے کا حکم دیا اور پولیس کو ہدایت کی کہ تحقیقات مکمل کرکے متعلقہ عدالت میں چالان پیش کرے۔

عدالت نے کیس میں ریمارکس دیے کہ پولیس تحقیقات مکمل کرنے میں ناکام رہی۔ متعدد بار حتمی چالان پیش کرنے کا حکم دیا گیا جس پر عمل درآمد نہیں کیا گیا جس پرعدالت نے تمام ملزمان کی ضمانت قبل از گرفتاری کی توثیق کردی۔

ضمانت حاصل کرنے والوں میں ڈپٹی ڈائریکٹر ڈیزائن ایس بی سی اے فرحان قیصر اور ڈی ڈی او ماسٹر پلان بشیر احمد خان کے علاوہ دیگر ملزمان میں ایڈیشنل ڈائریکٹر ایم پی جی او ولایت خان اور شوکت علی میمن بھی شامل ہیں۔

مجموعی طور پر 11 ملزمان کی عبوری ضمانت کی توثیق ہوئی جبکہ نسلہ ٹاور کے بلڈر عبدالقادر گذشتہ دنوں انتقال کرچکے ہیں۔

ملزمان کے خلاف تھانہ فیروز آباد میں مقدمہ درج ہے۔ سپریم کورٹ کے حکم پر ملزمان کے خلاف مقدمہ درج کیا گیا ہے۔