عالیہ حمزہ نے کہا ہے کہ اپوزیشن کا ایجنڈا عوام کو گمراہ کرنا ہے۔

پاکستان تحریک انصاف ( پی ٹی آئی ) کی رہنما عالیہ حمزہ نے معاشی صورتحال پر اپوزیشن کی تنقید کو بلا جواز قرار دے دیا ہے۔

انہوں نے کہا کہ اپوزیشن کا ایجنڈا عوام کو گمراہ کرنا ہے، پارلیمانی سیکریٹری عالیہ حمزہ نے معاشی اعشاریے بھی جاری کر دیے، رواں مالی سال جولائی سے فروری تک برآمدات میں 26 فیصد اضافہ ہوا ہے۔

عالیہ حمزہ نے کہا کہ پاکستان کی برآمدات 20 اعشاریہ 55 ارب ڈالر تک پہنچ گئی ہیں، پیپلز پارٹی حکومت کے آخری 8 ماہ میں برآمدات سے موجودہ برآمدات 4 اعشاریہ 6 ارب ڈالر زیادہ ہیں۔

پاکستان تحریک انصاف ( پی ٹی آئی ) کی رہنما نے کہا کہ ن لیگ کے دور کے آخری 8 ماہ سے 5 اعشاریہ 7 ارب ڈالر زیادہ ہیں، فروری 2022 میں ٹیکسٹائل کی برآمدات 37 فیصد اضافے کے ساتھ 1.68 ارب ڈالر ہو گئی ہیں۔

انہوں نے کہا کہ گزشتہ مالی سال فروری میں برآمدات 1.2 ارب ڈالر تھیں، 8 ماہ میں ٹیکسٹائل ایکسپورٹس 12.61 ڈالر ہو گئی، گزشتہ مالی سال یہ 10 ارب ڈالر تھیں، موجودہ حکومت کی معاشی پالیسیوں کے مثبت نتائج سب کے سامنے ہیں۔

 عالیہ حمزہ نے کہا کہ تجارتی خسارہ 10 ماہ کی کم ترین سطح پر پہنچ گیا ہے، موجودہ دور حکومت میں درآمدات میں کمی، برآمدات میں اضافہ ہو رہا ہے، اپوزیشن ملکی مفاد کے بجائے ذاتی مفاد کو ترجیح دے رہی ہے۔