شاہ رخ خان کے بیٹے آریان خان کی منشیات برآمدگی کیس میں بھارتی اینٹی ڈرگ ایجنسی نے عدالت سے تحقیقات کے لئے مزید مہلت مانگ لی۔

بھارتی میڈیا رپورٹ کے مطابق بالی ووڈ کنگ، شاہ رخ خان کے بیٹے آریان خان کی منشیات برآمدگی کیس میں بھارتی اینٹی ڈرگ ایجنسی، نارکوٹکس کنٹرول بیورو 6 ماہ کی ڈیڈ لائن کے دوران بھی کچھ نہ کرسکی۔

ایجنسی کو 2 اپریل کو چاج شیٹ تیار کر کے آریان خان کے خلاف پیش کرنی تھی تاہم آج اس کیس کے سماعت کے دوران ایجنسی نے کیس کی تحقیقات کے لئے عدالت سے مزید وقت مانگ لیا۔

بھارتی میڈیا رپورٹ کے مطابق اینٹی ڈرگ ایجنسی، عدالت میں ہونے والی آج سماعت کے دوران نارکوٹکس کنٹرول بیورو کی جانب سے مؤقف اختیار کیا گیا ہے کہ بالی ووڈ اداکار کے بیٹے آریان خان کا کیس ہائی پروفائل کیس ہے، اس میں ابھی تفتیش جاری ہےجس کے لیے مزید وقت درکار ہے۔

ایجنسی کی جانب سے عدالت سےدرخواست کی گئی ہے کہ چارج شیٹ جمع کرانے کے دورانیے میں مزید 90دن کی توسیع کی جائے۔

یاد رہے کہ آریان خان کے خلاف ثبوت کی فراہمی کے لیے نارکوٹکس کنٹرول بیورو کی جانب سے 6 ماہ کا عرصہ مانگا گیا تھا، ایجنسی کی جانب سے کروز شپ کیس میں آریان خان کے خلاف چھ ماہ کی ڈیڈ لائن ختم ہونے میں صرف چند دن باقی رہ گئے ہیں تاہم ایجنسی تاحال آریان کے خلاف ٹھوس ثبوت اکھٹے نہیں کر سکی۔

واضح رہے کہ آریان خان کو این سی بی کی جانب سے گزشتہ سال 3 اکتوبر کو ممبئی کے ساحل پر ایک کروز شپ پر چھاپے کے دوران گرفتار جبکہ 19 دیگر ملزمان کو اس کیس میں نامزد کیا گیا تھا۔

شاہ رخ خان کے بیٹے آریان خان نے اس کیس کے سلسلے میں 22 دن جیل میں گزارے تھے جس کے بعد وہ ضمانت پر رہا کر دیئے گئے تھے۔