وفاقی وزیر منصوبہ بندی اسد عمر نے کہا ہے کہ جہانگیر ترین اور علیم خان پی ٹی آئی کے مخالف نہیں ہیں۔

اسلام آباد میں بول نیوز سے خصوصی گفتگو کے دوران اسد عمر نے کہا کہ شیریں مزاری کے ہوتے ہوئے اپوزیشن کوئی تحریک کامیاب نہیں ہوسکتی۔
اسد عمر نے کہا کہ جہانگیر ترین اور علیم خان دونوں تحریک انصاف کے لوگ ہیں پی ٹی آئی کے مخالف نہیں، ان کا فعال ہونا اچھی بات ہے۔

اس سے قبل وزارت منصوبہ بندی میں قومی صنفی پالیسی فریم ورک کے افتتاحی تقریب سے خطاب کرتے ہوئے وزیر منصوبہ بندی اسد عمر نے کہا کہ خواتین کے حقوق اور ملک کی بقاء میں ان کے کردار کے حوالے سے بات کی ہے۔

 انہوں نے کہا کہ کوئی ملک ترقی نہیں کرسکتا جب تک اس کی خواتین اپنا کردار نہ ادا کریں کیونکہ ملکی کی نصف آبادی کو پیچھے رکھ کر ہم ترقی نہیں کرسکتے ہیں۔

 ان کا کہنا تھا کہ خواتین کی صحت، تعلیم، سلامتی اور ایمپاورمنٹ کیلئے قومی فریم ورک  اہمیت کا حامل ہے۔

انہوں نے کہا کہ عمران خان کا ویژن سماجی تحفظ فراہم کرنا تھا اور ثانیہ نشتر کے ذریعے سماجی تحفظ کے اس پروگرام کا آغاز دیا گیا کیونکہ پاکستان میں خواتین کو تعلیم کے حوالے سے خصوصی مسائل کا سامنا ہے۔

انہوں نے مزید کہا کہ نگار جوہر کا آرمی میں لیفٹیننٹ جنرل کے عہدے تک پہنچنا ایک اعزاز ہے جبکہ کورونا کی روک تھام کیلئے خواتین نے اہم کردار ادا کیا کیونکہ پاکستان میں 76 فیصد ہیلتھ کیئر ورکرز ہیں اور 55 فیصد ڈاکٹرز خواتین ہیں۔

اس سے قبل وزیر اعظم کی معاون خصوصی برائے تخفیف غربت سینیٹر ثانیہ نشتر نے کہا ہے کہ پاکستان میں 50 فیصد سے زائد خواتین کی بہتری کیلئے اقدامات کئے جارہے ہیں۔

 ان کا کہنا تھا کہ آج احساس کفالت پروگرام کے تحت 14 ہزار روپے خواتین میں نقد تقسیم کئے جارہے ہیں۔

انہوں نے کہا کہ احساس پروگرام کے ذریعے بہتر حکمت عملی سے عوام کا طرز معاشرت بہتر بنایا جارہا ہے۔

بعدازاں اس تقریب سے خطاب کرتے ہوئے وزیر انسانی حقوق شیریں مزاری  کا کہنا تھا کہ موجودہ حکومت نے خواتین کو درپیش مسائل کے حل کیلئے اقدامات کئے ہیں۔

انہوں نے بتایا کہ خواتین اور بچوں کے حقوق اور تحفظ کیلئے قانون سازی کی گئی ہے کیونکہ حکومت کی یہ ذمہ داری ہے کہ وہ اپنے شہریوں کے حقوق کا تحفظ کرے۔

ان کا کہنا تھا کہ حکومت کی جانب سے خواتین اور لڑکیوں کو سازگار ورکنگ ماحول فراہم کرنے کیلئے اقدامات کئے جارہے ہیں۔