گورنر پنجاب چوہدری محمد سرور نے کہا ہے کہ تحریک عدم اعتماد پیش کرنا اپوزیشن کا آئینی حق ہے اور رزلٹ سب کے سامنے آجائے گا۔

گورنر چوہدری محمد سرور نے لاہور یونیورسٹی میں میڈیا سے گفتگو کرتے ہوئے کہا کہ کامیاب جوان پروگرام کی کامیابی پر عثمان ڈار کو خراج تحسین پیش کرتا ہوں۔

انہوں نے کہا کہ شوکت ترین کی اسپورٹ سے عمران خان کا خواب شرمندہ تعبیر ہوا، کامیاب پروگرام کے تحت 15 ہزار نوکریاں دینے میں کامیاب ہوا ہے۔

گورنر پنجاب کا کہنا ہے کہ جب سے گورنر بنا ہوں میرا چیلنج تھا کہ وائس چانسلرز کی تعیناتی کی جائے، ابھی تک 20 وائس چانسلرز لگائے جو بالکل میرٹ پر لگائے گئے۔

چوہدری محمد سرور نے مزید کہا کہ پنجاب کی یونیورسٹیز انٹرنیشنل یونیورسٹیز کی رینکنگ میں ہیں، بینک آف پنجاب کے صدر کا شکریہ جنہوں نے ہر پروگرام میں لیڈ لی ہے، آپ ہمارے چہرے دیکھ لیں کیا پریشانی نظر آرہی ہے۔

لاہور یونیورسٹی میں میڈیا سے گفتگو کرتے ہوئے وزیراعظم کے معاون خصوصی برائے یوتھ افیئر عثمان ڈار نے کہا کہ دلی خوشی ہے کہ کامیاب جوان پروگرام پنجاب میں خصوصی لاہور سے آغاز کر رہے ہیں۔

عثمان ڈار نے کہا کہ ابھی تک انتیس ارب روپے پنجاب میں تقسیم کیے جا چکے ہیں جبکہ ساڑھے پانچ ارب روپے لاہور کے جوانوں میں تقسیم کیے ہیں۔

انہوں نے کہا کہ یہ پروگرام  پچاس ہزار لوگوں کیلئے روزگار پیدا کر چکا ہے جبکہ چھتیس ہزار لوگوں کو پنجاب میں اور لاہور میں نو ہزار لوگ پروگرام سے مستفید ہو چکے ہیں۔

عثمان ڈار نے کہا کہ ایک لاکھ ساٹھ ہزار میں سے پینسٹھ ہزار اسکالر شپ پنجاب میں دی گئیں جبکہ نو ہزار سکارلرشپ لاہور کے نوجوانوں کو دی گئی ہیں۔

انہوں نے مزید کہا کہ کل گجرانوالہ میں ویٹ لفٹنگ پروگرام کا آغاز کر رہے ہیں جبکہ ریسلنگ پروگرام میں انعام بٹ امبیسڈر ہیں۔