فیفا ورلڈ کپ کوالیفائنگ مقابلوں میں کینیڈا کی فٹ بال ٹیم نے جمیکا کے خلاف 4-0 سے میچ جیت کر تاریخ رقم کر دی۔

برطانوی میڈیا کے مطابق کینیڈا نے 36 سال بعد پہلی مرتبہ فیفا ورلڈ کپ قطر 2022 کے لئے کوالیفائی کر لیا ہے۔

ٹورنٹو میں ہونے والے اس میچ میں کینیڈا کی جیت کے بعد کینیڈین فٹ بال ٹیم اپنے گروپ میں ٹاپ تھری میں جگہ بنا چکی ہے۔

کینیڈا نے اپنا آخری ورلڈ کپ 36 سال قبل 1986 میں میکسیکو میں کھیلا تھا اور نہایت ہی مایوس کن کارکردگی کا مظاہرہ کیا تھا، اور اپنے گروپ میں بنا کوئی گول کئے آخری پوزیشن حاصل کی تھی۔

فیفا ورلڈ کپ قطر 2022 کے کوالیفائنگ مقابلے میں کینیڈا کے کائل لارن اور تاجون بچانن نے ہاف ٹائم سے قبل ہی ٹیم کو 2-0 کی برتری دلا دی تھی۔

کینیڈا کی جانب سے جونئیر ہوئلیٹ نے بھی ایک گول اسکور کیا جبکہ جمیکا کے ڈیفینڈر نے فٹ بال اپنے ہی گول پوسٹ میں پھینک کر کینیڈا کی برتری کو 4-0 تک مضبوط اور مستحکم کر دیا۔

کینیڈین فٹ بال کی تاریخ میں یہ دوسرا موقع ہے کہ جب قومی ٹیم نے فٹ بال کے میگا ایونٹ میں اپنی جگہ پکی کی ہے۔

کینیڈین فٹ بال ٹیم کی اس تاریخ ساز کامیابی میں ٹیم کے انگلش کوچ جان ہرڈمین کا بہت بڑا ہاتھ ہے جن کی کوچنگ میں کینیڈا کی خواتین فٹ بال ٹیم نے 2012 اور 2016 کے اولمپکس میں برونز میڈلز حاصل کئے تھے۔