بھارتی ریاست جھارکھنڈ کے دھنباد ضلع سے مشہور زمانہ فلم “گینگز آف واسع پور” قسم کا ایک انوکھا معاملہ سامنے آیا ہے۔

آپ نے اب تک ڈکیتی، قتل یا دھمکانے کے لے بم مارنے کی خبریں پڑھی ہوں گی۔ لیکن اب ایک نیا معاملہ سامنے آیا ہے جس نے کئی لوگوں کو حیرت میں جبکہ کئی کو خوف میں مبتلا کردیا ہے۔

دھنباد میں طلاق نہ دینے پر بیوی کے گھر والوں نے شوہر کے گھر پر بم برسا دئیے۔

دھنباد کوئلانچل میں اب تک بھتہ خوری اور علاقے میں غلبہ کے لیے بمباری عام بات ہے، لیکن اس بار کوئلانچل میں ہونے والی اس بمباری کی وجہ عجیب و غریب ہے۔

بمباری کا واقعہ منگل کو رات گئے واسع پور سٹی اسکول کے قریب رہنے والے شمشاد عالم کے گھر پر پیش آیا۔ حملہ آور واردات کے بعد فرار ہو گئے۔

شمشاد نے معاملے کی اطلاع پولیس کو دی جس کے بعد مقامی بھولی او پی کی پولیس موقع پر پہنچ گئی۔ پولیس نے موقع سے ایک بم برآمد کیا۔

اس حوالے سے شمشاد کا کہنا ہے کہ رات گئے بمباری کے واقعہ کو انجام دینے کے بعد لوگ فرار ہوگئے۔ اطلاع دینے کے بعد پولیس جائے واقعہ پر پہنچی اور زندہ بم کو پانی میں ڈال دیا۔

شمشاد نے بتایا کہ بمباری ان کے سسرال والوں نے کرائی ہے،  جو بیوی کو زبردستی طلاق دینے کے لیے دباؤ ڈال رہے ہیں، اسی وجہ سے سسرالی فریق کے لوگ خوف و ہراس پھیلانے کی کوشش کر رہے ہیں۔

سسرال والوں کے ساتھ رام گڑھ کورٹ میں بھی مقدمہ چل رہا ہے۔ رام گڑھ کے برکاکانہ میں شمشاد کا سسرال ہے۔

شمشاد نے بتایا کہ گزشتہ 8 تاریخ کو رام گڑھ عدالت میں مقدمہ کی سماعت تھی۔ 8 تاریخ کو رام گڑھ عدالت میں پیش بھی ہوئے تھے۔

شمشاد کا کہنا تھا کہ عدالت سے باہر آنے کے بعد سسرال والوں کی جانب سے برباد کرنے کی دھمکی دی گئی تھی، جس کے بعد دیر رات سسرالیوں کی جانب سے بمباری کے واقعہ کو انجام دیا گیا۔ شمشاد نے پولیس سے تحفظ کی درخواست کی ہے۔

وہیں متاثرہ شخص کے بھائی نوشاد عالم نے بھی بتایا کہ بمباری بھائی کے سسرال والوں نے کی ہے۔ اس واقعہ کے بعد ہر کوئی خوفزدہ ہے۔ ہمارا پولیس سے مطالبہ ہے کہ ملزمان کے خلاف کارروائی کی جائے اور ہمارے خاندان کو تحفظ فراہم کیا جائے۔