دنیا بھرمیں کرپٹوکرنسی اور ڈیجیٹل اثاثوں کو قانونی دائرہ کار میں لانے کے لیے کوششیں کی جارہی ہیں تو کچھ ممالک میں کرپٹو کے خلاف کریک ڈاؤن کیا جا رہا ہے۔

چین کا شمار بھی دنیا کے ان ممالک میں کیا جاتا ہے جہاں کرپٹو پر نگرانی مزید سخت کردی گئی ہے۔

حکومتی پالیسیوں کو مد نظر رکھتے ہوئے میسیجنگ ایپ وی چیٹ کے ڈیولپر ٹینسینٹ نے اپنی اپیلی کیشن پر این ایف ٹی کے پبلک اکاؤنٹس سے منسلک تمام لنکس کو بلاک کردیا ہے۔

ٹینسینٹ کے اس اقدام کا مقصد وی چیٹ کے ذریعے پرانے اور رسکی نان فنجائی ایبل ٹوکنز کی خرید و فروخت کا سدباب کرنا ہے۔

این ایف ٹی کو ابھی تک چین میں آفیشلی ڈیجیٹل اثاثے کے زمرے میں شامل نہیں کیا گیا ہے۔

کمپنی کی جانب سے جن این ایف ٹی ٹریڈنگ پلیٹ فارمزپر وی چیٹ اکاؤنٹس تک رسائی پر پابندی عائد کی گئی ہے اس میں آرٹ میٹا، آئی باکس، ون میٹا اور دیگر بڑے نام شامل ہیں۔

یاد رہے کہ چینی قوانین کے تحت کرپٹو کرنسی کی تجارت اور مائننگ پر سخت پابندی عائد ہے، تاہم این ایف ٹی کو حاصل قانونی حیثیت کے بارے میں ابہام موجود ہیں۔

نان فنجائی ایبل ٹوکن کیا ہے؟

کرپٹو کرنسی کے ذریعے ڈیجیٹل اثاثوں کی خریدوفروخت کو نان فنجائی ایبل ٹوکن کی شکل میں پیش کیا جاتا ہے۔ لیکن کاغذ پر بنی کسی شے کی تصویر این ایف ٹی نہیں ہوگی بلکہ وہ ڈیجیٹل تصویر، یوٹیوب کی پہلی ویڈیو، ایپل کا پہلا کوڈ یا پھر سی این این کا پہلا ویب پیچ ہوسکتی ہے۔

سادہ الفاظ میں صرف ڈیجیٹل یا سائبر اسپیس میں تیار ہونے والا کوئی شاہکار ہی این ایف ٹی کہلائے گا۔