یوکرینی صدر ولادیمیر زیلنسکی کا پارلیمنٹ سے ورچوئل خطاب میں کہنا تھا کہ یورپی یونین اپنے عمل سے ثابت کرے کہ وہ ہمارے ساتھ کھڑی ہے۔

غیر ملکی خبر رساں ادارے کے مطابق یورپی یونین کی پارلیمنٹ کے ہنگامی اجلاس سے یوکرین کے صدر ولادیمیر زیلنسکی نے ورچوئل خطاب کیا۔

اس موقع پر ان کا کہنا تھا کہ اس وقت روسی افواج نے ملک بھر میں تقریباً تمام ہی بڑے شہر بلاک کردیئے ہیں۔ تاہم، اس کے باوجود ہم اپنی زمین اور آزادی کے لیے لڑتے رہیں گے۔کوئی بھی طاقت ہمیں توڑ نہیں سکتی، ہم مضبوط ہیں کیوں کہ ہم یوکرینی ہیں۔ ہم اپنے حقوق کی جنگ لڑ رہے تھے اور اب اپنی بقاء کی جنگ لڑ رہے ہیں۔

صدر ویلادیمیر زیلنسکی نے نیٹو اور مغربی ممالک سے شکوہ کیا کہ ہمیں جنگ دوران تنہا چھوڑ دیا گیا ہے۔ اب وقت ہے کہ یورپی یونین بھی ثابت کرے کہ وہ ہمارے ساتھ کھڑی ہے یا نہیں۔

یاد رہے کہ صدر ولادیمیر زیلنسکی نے محفوظ مقام پر منتقلی کی امریکی پیشکش کو ٹھکراتے ہوئے چند روز قبل کہا تھا کہ ہمیں جنگ کے لیے اسلحہ چاہیئے انخلاء کے لیے گاڑی نہیں۔

بین الاقوامی امور پر نظر رکھنے والے ماہرین کا کہنا ہے کہ حالات بتدریج خرابی کی جانب گامزن ہیں۔ ایسا لگتا ہے کہ روس کا جنگ میں پلڑہ بھاری ہے۔ امریکا اور مغربی اتحاد کی یوکرین سے جنگی امداد دینے کی وعدہ خلافی یوکرین کی تباہی کا باعث بن رہی ہے۔