فواد چوہدری نے کہا ہے کہ ڈی چوک جلسے کا عنوان نیکی کی تلقین ہے۔

وفاقی وزیر اطلاعات فواد چوہدری نے پریس کانفرنس کرتے ہوئے کہا کہ جو حکومت کے خلاف نکلے تھے ان کوعمران خان کی مقبولیت کا اندازہ نہیں تھا۔

انہوں نے کہا کہ اپوزیشن کو پتہ چل گیا عوام کو لیڈر کا کتنا احساس ہے، ڈی چوک جلسے کا عنوان نیکی کی تلقین ہے، منحرف ایک رکن نے فون کیا اور ہم سے معذرت کی۔

  فواد چوہدری نے کہا کہ اتحادیوں کی طرف سے امید ہے اچھا فیصلہ آجائے گا، حکومت نہیں جارہی، قوم پر فخر ہے جنہوں نے ثابت کیا کہ برائی برائی ہے۔

وفاقی وزیر اطلاعات نے کہا کہ سارے شیخ چلی اکھٹے ہوئے ہیں، تمام چالیں اور مستقبل حکومت کے پاس ہیں، بادشاہ کو گرانے والوں کو پتہ نہیں تھا کتنی مشکلات کا سامنا ہوگا۔

انہوں نے کہا کہ عمران خان کی مقبولیت دیکھ کر لوگ دنگ رہ گئے ہیں۔

دوسری جانب وفاقی وزیر توانائی حماد اظہر نے وفاقی وزیر اطلاعات فواد چوہدری کے ہمراہ پریس کانفرنس کرتے ہوئے کہا ہے کہ عوام میں غم و غصہ پایا جاتا ہے کہ ووٹ عمران خان  کے نام پر لیا اورفریب کیا گیا۔

انہوں نے کہا کہ منحرف اراکین سے عوام حساب مانگ رہے ہیں، منحرف اراکین  میں سے کچھ ایسے ہیں جن کو غلطی کا احساس ہوگیا اور انہوں نے رابطہ کرلیا، ووٹر نے گزشتہ روز نورعالم سے پوچھا ووٹ کس کے نام پر لیا؟

حماد اظہر نے کہا کہ اراکین سے حساب مانگنا کوئی بری بات نہیں، عمران خان کے خلاف جانے والے اراکین نے عوامی جذبات کونہیں سمجھا۔