قومی ٹیسٹ ٹیم کے نائب کپتان محمد رضوان کا کہنا ہے کہ ٹم ڈیوڈ اور ڈیوڈ ویلے نے اسلام سے متاثر ہوکر مجھ سے کئی سوالات کیے ہیں۔

پاکستان سپر لیگ کے ساتویں مرحلے کا اختتام ہوگیا جس میں لاہور قلندرز کو پہلی بار چیمپئن بننے کا اعزاز حاصل ہوا تاہم پی ایس ایل سے جڑی خبریں اب بھی میڈیا میں گردش کررہی ہیں جس سے اس لیگ کی مقبولیت کا اندازہ لگایا جاسکتا ہے۔

پی ایس ایل 7 کے فائنل میں لاہور قلندرز نے ٹائٹل کا دفاع کرنے والی ملتان سلطانز کو 42 رنز سے شکست دی تاہم ملتان سلطانز کے کپتان محمد رضوان نے شکست کے باوجود کئی ایوارڈز اپنے نام کیے۔

محمد رضوان کو بیسٹ وکٹ کیپر آف دی پی ایس ایل ، اسپرٹ آف دی کرکٹ ایوارڈ کے علاوہ انہیں مین آف دی ٹورنامنٹ بھی قرار دیا گیا جب کہ وہ پی ایس ایل کی ٹیم کے کپتان بھی مقرر کیے گئے۔

یہ بھی پڑھیں: پی ایس ایل 2022 کی ٹیم کا اعلان، قیادت رضوان کے حوالے

ملتان سلطانز میں کپتان محمد رضوان کے علاوہ ٹم ڈیوڈ نے بیٹنگ اور ڈیوڈ ویلے نے بولنگ میں انتہائی اہم کردار اد کیا جس کی بدولت ملتان سلطانز کو فائنل سے پہلے صرف ایک میچ میں شکست کا سامنا کرنا پڑا تھا۔

ایک انٹریو میں ملتان سلطانز کے کپتان محمد رضوان نے انکشاف کیا کہ پاکستان سپر لیگ کے دوران ہماری ٹیم کے کئی غیر ملکی کھلاڑی دین اسلام سے متاثر ہوئے اور ٹم ڈیوڈ اور ڈیوڈ ویلے نے تو مجھ سے اسلام سے متعلق کوئی سوالات بھی کیے۔

محمد رضوان نے کہا کہ میں نے ٹم ڈٰیوڈ اور ڈیوڈ ویلے کی جانب سے پوچھے گئے تمام سوالات کے اطمینان سے جواب دیے کیوں کہ ہمیں اپنے دین پر شرمانے کی ضرورت نہیں بلکہ فخر ہونا چاہیے۔

یہ بھی پڑھیں: پی ایس ایل 7 میں کس کھلاڑی کو کیا ایوارڈ ملا؟

ملتان سلطانز کے کپتان کا کہنا تھا کہ جب بھی غیر ملکی کھلاڑی ہم سے دین اسلام سے متعلق سوالات پوچھتے ہیں تو سکون ملتا ہے جب کہ میچز کے دوران نماز ہم پڑھتے ہیں اور سکون ان کھلاڑیوں کو ملتا ہے۔