کھن کھجورے سے چھوٹے لیکن بہت سی ٹانگوں والے ایک نئے کیڑے (ملی پیڈ) کا نام مشہور امریکی گلوکارہ ٹیلرسوئفٹ کے نام پر رکھا گیا ہے۔

یہ کیڑا امریکا کی مشہور اپالاچیئن پہاڑیوں سے دریافت ہوا ہے جو دیکھنے میں کیٹرپلر جیسا ہے اور اس کی دھاگے نما ٹانگیں کچھ خمیدہ ہیں۔ اب اس کا حیاتیاتی نام “ناناریا سوئٹائی” رکھا گیا ہے جس کا نام ٹیلرسوئفٹ کے نام سوئفٹائی پر ہے۔ یہ بہترین ڈی کمپوزر ہے جو گھاس پھوس اور سوکھے پتوں کو ٹھکانے لگاتا ہے اور زمین کی زرخیزی میں اضافہ کرتا ہے۔

            یہ گھنے سبزے والے جنگلات کے فرش پر رہتا ہے اور بہت کم باہر نکلتا ہے ۔ یہی وجہ ہے کہ یہ سائنسدانوں کی نظروں سے اوجھل رہا اور صرف پتے کھانے باہرآتا ہے اور دوبارہ مٹی کے اندر جا چھپتا ہے۔ امریکی ادارے ورجنینیا ٹیک کے تین ماہرین نے اسے خاک چھاننے کے بعد گرفتار کیا گیا ہے۔ اس کی نسل کے درجنوں بہن بھائی اور ہیں لیکن اب تک اس نئی قسم سے ماہرین واقف نہ تھے۔

اس تحقیق کی روداد زو کیز نامی جرنل میں شائع ہوئی ہے۔ امریکی سائنس فاونڈیشن کے مالی اشتراک سے اس کی تلاش 17 امریکی ریاستوں میں شروع ہوئی اور ایک سال بعد ماہرین نے اس کی شکل دیکھی ہے۔ سب سے پہلے اس کا ڈی این اے نکالا گیا اور اس کا دیگر انواع کے ڈیٹا بیس سے موازنہ کیا گیا ہے۔

لیکن اچھی بات یہ ہے کہ اس پورے تحقیقی سفر میں سائنسدانوں نے چھوٹے بڑے 1800 کیڑے جمع کئے ہیں جن پر غور جاری ہے۔ توقع ہے کہ اس سے بھی نئی انواع اور دریافتیں سامنے آئیں گی۔