بھارتی معروف اداکار گووندا نے انکشاف کیا ہے کہ امیتابھ بچن نے انہیں دورانِ شوٹنگ تھپڑ مارنے کی دھمکی دی تھی۔

بھارتی میڈیا رپورٹ کے مطابق ان دنوں میڈیا پر بالی وُڈ کے بِگ بی امیتابھ بچن اور کامیڈین اداکار گووند اُرن اہوجا المعروف گووندا کے ماضی کا ایک یادگار قصہ موضوعِ بحث ہے۔

گووندا نے حال ہی میں اپنے ایک انٹرویو میں انکشاف کیا کہ اکتوبر 1998 ریلیز ہونے والی فلم بڑے میاں چھوٹے میاں میں ایک گانے کی عکسبندی کے دوران امیتابھ بچن میرے پاس آئے اور  دھمکی دی کہ اگر یہ فلم باکس آفس پر نہیں چلی تو وہ انہیں تھپڑ ماریں گے۔

اداکار نے مزید بتایا کہ میں امیتابھ بچن کی اس دھمکی سے حقیقتاً ڈر گیا تھا اور میں نے اسی وجہ سے شوٹنگ منسوخ کر دی تھی۔

بھارتی ویب سائٹ کے مطابق دراصل گووندا فلم میں اس نوعیت کے کسی گانے کے حق میں نہیں تھے، گووندا کا کہنا تھا کہ اس طرح کا سین لوگوں کو پسند نہیں آئے گا جس کی وجہ سے شوٹنگ میں بھی تاخیر ہوئی۔

دوران انٹرویو گووندا نے بتایا کہ ہدایتکار ڈیوڈ دھون ان کے پاس آئے اور  پوچھا کہ آپ کو اتنا یقین کیوں ہے کہ یہ گانا نہیں چلے گا۔

اس وقت گووندا نے جواب دیا کہ امیت جی نے مجھے تھپڑ مارنے کی دھمکی دی ہے جس کے بعد ان دونوں نے فیصلہ کیا کہ یہ گانا صحیح نہیں ہے۔

سپر اسٹار نے مزید بتایا کہ بعد میں ان کی ٹیم نے فیصلہ کیا جب تک فلم کے لیے کوئی اچھا گانا نہیں مل جاتا وہ شوٹنگ نہیں کریں گے۔

گووندا کے اس انٹرویو کے بھارتی میڈیا پر بہت چرچے ہیں اور سوشل میڈیا پر بھی گووندا کا یہ انٹرویو وائرل ہو رہا ہے۔