وزیراعظم عمران خان نے اسمبلیاں تحلیل کرکے حزبِ اختلاف کو جس صدمے سے دوچار کیا ہے، شاید ہی وہ اس سے اب نکل پائیں۔

کارروائی کے بعد پی ٹی آئی اراکین کے چہروں پر تشویش تھی اس کی جگی اب اطمینان نے لے لی ہے۔

جہاں حکومت اور اپوزیشن ایک دوسرے کے خلاف سرگرم تھیں، وہیں صورت حال سے بوکھلائے تحریک انصاف کے رہنما اور سابق وزیر یاسر ہمایوں نے ایک صحافی کو بھی دبوچ لیا۔

گزشتہ روز پنجاب اسمبلی کے ہنگامہ خیز اجلاس ہوا جس میں شرکت کے لیے عثمان بزدار بھی پہنچے، لیکن ایسے میں صحافیوں کو اجلاس کی کوریج کی اجازت نہیں دی جا رہی تھی۔

اسی گرما گرمی میں موقع پر موجود صحافیوں میں شامل سینئر صحافی اخلاق احمد باجوہ کو تحریک انصاف کے سابق وزیر یاسر ہمایوں نے گلے سے پکڑلیا۔

ویڈیو دیکھ لیں، حکومتی من پسندی، صحافیوں کا گلا دبانا شروع کر دیا، پی ٹی آئی کے سابق وزیر یاسر ہمایوں نے سینئر صحافی اخلاق احمد باجوہ کا گلا دبا دیا صحافیوں کو پنجاب اسمبلی اجلاس کی کوریج کی اجازت نہیں دی جا رہی۔ یہ کیا بدمعاشی ہے گھٹیا حرکت پر اتر آئے ، pic.twitter.com/m8vmwtULgy

— Muhammad Hasan Raza (@HasanRazaLhr) April 2, 2022

ویڈیو شیئر کرتے ہوئے صحافی حسن رضا نے سوال اٹھایا کہ ’یہ کیا بدمعاشی ہے، گھٹیا حرکت پر اتر آئے ہیں‘۔

ویڈیو میں دیکھا جاسکتا ہے کہ شفقت محمود میڈیا کے کیمروں کے سامنے موجود ہیں اور تمام لوگوں کی نگاہ کا محور بھی وہی ہیں، لیکن اچانک یاسر ہمایوں سینئر صحافی کو گلے سے پکڑ کر دھکا دیتے ہوئے آگے آئے اور بار بار انگلی کا اشارہ کرکے انہیں کچھ کہتے رہے، بعد میں دیگر لوگ درمیان میں آئے اور بیچ بچاﺅ کرایا۔