پاکستان پیپلز پارٹی کے چیئرمین بلاول بھٹو زرداری نے کہا ہے کہ عمران خان کی کوشش ہے کہ وہ انگلی کٹوا کر کسی طرح شہید بنے۔

بلاول بھٹو زرداری نے وزیراعظم کے قوم سے خطاب پر رد عمل دیتے ہوئے کہا کہ عمران خان  نے 3 سال تک عوام سے جھوٹ بولا اور جاتے جاتے آئین شکنی کی، ہر پاکستانی چاہتا ہے کہ بیرونی مداخلت ہے تو سامنے لائی جائے، بیرونی مداخلت ہو رہی ہوتی تو ہم نہ صرف مذمت کریں گے بلکہ اسے روکیں گے بھی۔

انہوں نے کہا کہ عمران خان کو جمہوری طریقے سے عدم اعتماد کے ذریعے ہٹایا جا رہا ہے، پچھلے سیشن میں یہ بھاگ کھڑے ہوئے، عمران خان کی کوشش ہے کہ وہ انگلی کٹوا کر کسی طرح شہید بنے۔

پیپلز پارٹی کے چیئرمین نے کہا کہ ہمارا مطالبہ تھا کہ خط عدالت میں پیش کیا جائے، کل وہ اسمبلی میں بھی خط لے کر نہیں آ رہے، عمران خان کہتے ہیں عدالت نے خط نہیں دیکھا۔

بلاول بھٹو زرداری نے کہا کہ کیا خط عدالت میں پیش کیا گیا، عمران خان نے خط عدالت میں پیش کیا نہ ہی اسمبلی میں لا رہے ہیں، پاکستان کے تمام مسائل کا حل جمہوریت میں ہے۔

بلاول بھٹو زرداری نے مزید کہاکہ عمران خان نے اپنی انا کی وجہ سے یکطرفہ انتخابی اصلاحات کروائیں، جتنا جلدی ہم انتخابی اصلاحات کر لیں اتنی جلد انتخابات بھی ہوں گے، مجھے ایسا ہی لگ رہا ہے کہ انتخابات اسی سال ہوں گے۔