سندھ ہائ کورٹ نے بلدیاتی انتخابات کے شیڈول کیخلاف پی ٹی آئی کی درخواست قابل ہونے پر فیصلہ محفوظ کر لیا۔

تفصیلات کے مطابق  تحریک انصاف کے رہنماؤں کی جانب سے بلدیاتی انتخابات کا شیڈول سندھ ہائی کورٹ میں چیلنج کیا گیا تھا۔

 بلدیاتی انتخابات کے شیڈول کے خلاف تحریک انصاف کے رہنماؤں حلیم عادل شیخ، فردوس شمیم نقوی اور دیگر کی جانب سے سندھ ہائیکورٹ میں درخواست دائر کی گئی تھی جسے عدالت نے قابل سماعت ہونے سے متعلق فیصلہ محفوظ کرلیا۔

علی پلھ ایڈووکیٹ نے مؤقف پیش کیا کہ سپریم کورٹ نے صوبائی حکومت کو بلدیاتی ادارے بااختیار بنانے کا حکم دیا تھا۔

چیف جسٹس احمد علی شیخ نے کہا کہ سپریم نے انتخابات کرانے کا حکم دیا تو ہم کیسے روک سکتے ہیں؟

وکیل درخواست گزار نے کہا کہ عدالتی حکم پر بلدیاتی آرڈیننس میں ترمیم کے لیے کمیٹی بھی بنائی گئی ہے۔ الیکشن کمیشن مشاورت کے بغیر ہی انتخابی شیڈول جاری کردیا۔

وکیل تحریک انصاف نے کہا کہ لاہورہائیکورٹ نے بھی بلدیاتی انتخابات سے متعلق نوٹیفکیشن معطل کردیا ہے جس پر چیف جسٹس سندھ ہائی کورٹ نے کہا کہ یہ سندھ ہائیکورٹ ہے۔

تحریک انصاف کی درخواست میں کہا گیا کہ الیکشن کمیشن کی جانب سے سندھ میں بلدیاتی انتخابات کے پہلے مرحلے کے شیڈول کا اعلان کیا گیا ہے۔ الیکشن کمیشن کی جانب سے 13 اپریل کو جاری کیا گیا نوٹیفیکیشن غیر قانونی غیر آئینی ہے۔

تحریک انصاف کی درخواست میں کہا گیا کہ الیکشن کمیشن کا یہ اقدام سپریم کورٹ کے فیصلے کی خلاف ورزی ہے۔  سپریم کورٹ کے یکم فروری 2022 کے فیصلے کے مطابق بلدیاتی قانون میں ترمیم کا حکم دیا جائے۔

وکیل تحریک انصاف نے درخواست میں عدالت سے استدعا کی کہ سپریم کورٹ کے فیصلے کی روشنی میں الیکشن کمیشن کا جاری کردہ شیڈول معطل کیا جائے۔ الیکشن کمیشن نے سندھ کے چار ڈویژن میں 28 اپریل کو بلدیاتی الیکشن کے پہلے مرحلے کے شیڈول کا اعلان کیا تھا۔

پاکستان تحریک انصاف کی درخواست پر آج ہی فیصلہ سنائے جانے کا امکان ہے۔