سائنسی ترقی کی بدولت فاصلے سمٹ گئے اورموبائل کی انقلابی ایجاد نے رابطوں کو سہل بنادیا ہے، لیکن موبائل اب محض رابطے کے لئے ہی نہیں بلکہ یہ ایک ایسی ڈیوائس بن چکا ہے جو روزمرہ کے معمولات زندگی کی  انجام دہی میں آپ کومدد بھی فراہم کرتا ہے۔

موبائل میں صارفین کا سب سے پسندیدہ فیچر کیمراہوتا ہے جس کے ساتھ وہ ہر وقت سیلفی لیتے رہتے ہیں اور ساتھ ہی کئی طرح کے فلٹرسے گزار کر اسے خوبصورت بناتے ہیں۔

یہ بات تو سب ہی جانتے ہیں موجودہ دور میں کثرت سے سیلفی لینے کی عادت کو ماہرین نے ذہنی عارضہ قرار دیا ہے اور اس بچنے کے لئے ابھی تک کوئی باضابطہ طریقہ دریافت نہیں کیا گیا تاہم اب ایک ایپ بنائی گئی جو اس ضمن میں کار گار ثابت ہوسکتی ہے۔

بی رئیل ایپ کا یہ دعویٰ ہے کہ وہ اپنے صارفین کو دن میں صرف ایک بار سیلفی لینے کی اجازت دیتی ہے جس کے لئے صرف دومنٹ کا وقت دیاجاتا ہے اور اس ایپ کی سب سے حیرت انگیز بات یہ ہے کہ اس میں کسی قسم کا کوئی فلٹر موجود نہیں ہے اور نہ ہی آپ کوئی ایڈیٹنگ ٹول استعمال کرسکتے ہیں تاکہ سیلفی کسی بھی مصنوعی زیبائش اور آرائش سے محفوظ رہے۔

اس ایپ کی سب اچھی بات یہ ہے کہ یہ دن میں کسی بھی وقت آپ کو سیلفی کا وقت خود دیتی ہے آپ خود سے چاہتے ہوئے وقت کا حاصل نہیں کرسکتے اور صرف دو منٹ میں جہاں بھی ہو وہیں سے سیلفی لے کر دوستوں کے ساتھ شیئر کر سکتے ہیں یہی وجہ ہے کہ اس میں سب کچھ اصلی یعنی ریئل ہوتا ہے اسی لئے اس کا نام بی رئیل رکھا گیا ہے۔

اس کی ایک اور خاص بات یہ ہے کہ اگر آپ نے دن میں سیلفی لینے کا ٹائم کھودیا تو یہ آپ کے دوستوں کو اس کے بارے میں آگاہ کرے گی بلکہ آپ کو دوسروں کی پوسٹس کو چیک کرنے سے بھی روک دے گی۔

بی رئیل کو ڈاؤن لوڈ کرکے آپ کو اپنا پروفائل سیٹ کرنا پڑے گا اس کے ساتھ ہی آپ کو روزانہ تصویر کی پوسٹنگ کے لئے نوٹیفیکیشن جاری ہونے لگے گے۔