آسکرز کے دوران تقریب کے میزبان کامیڈین کرس راک کو تھپڑ مارنے کے بعد لائیو اسٹریمنگ پلیٹ فارم نیٹ فلکس نے امریکی اداکار وِل اسمتھ کے ساتھ  اپنے پراجیکٹس مؤخر کردئیے ہیں۔

کرس راک کو تھپڑ مارنے کے بعد فلمی پنڈتوں نے خدشہ ظاہر کیا تھا کہ اکیڈمی آف موشن پکچر آرٹس اینڈ سائنسز کی جانب سے  ان کے خلاف کارروائی کی جائے گی اور اداکار کو پابندیوں کا سامنا کرنا پڑسکتا ہے۔

اگر کارروائی ہوئی تو ول اسمتھ کے کیریئر کو نقصان پہنچے گا  اور ان سے بہت سے نئے پروجیکٹس چھن جائیں گے۔

جس کے بعد انہوں نے  اکیڈمی آف موشن پکچر آرٹس اینڈ سائنسز سے خود ہی استعفا دے دیا تھا۔

لیکن اس تھپڑ کی گونج ابھی تک تھمی نہیں ہے اور اس کے اثرات مسلسل ول اسمتھ کے سامنے آرہے ہیں۔

دنیا کے سب سے بڑے لائیو اسٹریمنگ پلیٹ فارم نیٹ فلکس نے تھپڑ تنازعے کے باعث ول اسمتھ کے ساتھ اپنے پروجیکٹ “فاسٹ اینڈ لوز” کو مؤخر کردیا ہے.

واضح رہے کہ وِل اسمتھ نے آسکر ایوارڈ کی تقریب کے دوران اپنی اہلیہ جیڈا پنکیٹ کے گنج پن کا مذاق اڑانے پر تقریب کے میزبان کامیڈین کرس راک کو براہ راست پروگرام کے دوران تھپڑ رسید کردیا تھا۔

گو کہ ایک دن بعد ہی اداکار نے اپنے نامناسب رویے پر کرس راک سے معافی مانگی تھی تاہم ادارے کی جانب سے ان کے خلاف تادیبی کارروائی کا اعلان کیا گیا تھا۔