پاکستان اور آسٹریلیا کے مابین جاری ون ڈے میچز کی سیریز کے دوسرے میچ میں میزبان پاکستان نے آسٹریلیا کو 6 وکٹوں سے شکست دے دی۔

سیریز کے اس میچ میں پاکستان کی کامیابی کے بعد سیریز ایک ایک سے برابر ہو گئی ہے۔

اس تاریخ ساز میچ میں جہاں پاکستان کے بیٹرز امام الحق اور کپتان بابر اعظم نے ریکارڈ سنچریز اسکور کر کے عالمی ریکارڈ بنایا وہیں قومی ٹیم کے نام بھی ایک ریکارڈ قائم کر دیا ہے۔

آسٹریلیا نے اس میچ میں مقررہ 50 اوورز میں 8 وکٹوں کے نقصان پر 348 رنز کا پہاڑ جیسا مجموعہ بنایا تھا۔

پاکستان نے امام الحق اور بابر اعظم کی ریکارڈ ساز سنچریوں کے بدولت یہ ہدف ایک اوور قبل ہی حاصل کر لیا اور میچ میں 6 وکٹوں سے کامیابی حاصل کی۔

https://twitter.com/TheRealPCB/status/1509596565459066890

یہ پاکستان کی ون ڈے کرکٹ کی تاریخ میں سب سے بڑے ہدف کا کامیابی سے تعاقب کرنے کا ریکارڈ بھی ہے۔

پاکستان نے اس سے قبل بنگلہ دیش کے خلاف 2014 میں 327 رنز کا ہدف حاصل کیا تھا۔

گرین شرٹس نے آسٹریلیا کے خلاف بھی اپنے پرانے ریکارڈ کو مزید بہتر کیا،  کیونکہ اس سے قبل پاکستان نے لاہور کے قذافی اسٹیڈیم میں آسٹریلیا کے خلاف 1998 میں 316 رنز کا ہدف حاصل کیا تھا۔