وزیراعظم شہباز شریف ایک روزہ دورے پر کراچی میں موجود ہیں، جہاں انہوں نے قائدِ اعظم محمد علی جناح کے مزار پر حاضری دی، اور مہمانوں کی کتاب میں اپنے خیالات درج کئے۔

وزیر اعظم نے اتحادی جماعتوں کے رہنماؤں کے ہمراہ مزار قائد پر حاضری دی، جہاں انہوں بانی پاکستان کی قبر پر پھولوں کی چادر چڑھائی اور فاتحہ خوانی کی۔

تصاویر سامنے آنے کے بعد سوشل میڈیا پر یہ سوال پوچھا جارہا ہےکہ وزیراعظم نے آخر اس کتاب میں کیا لکھا ہوگا؟

اس سوال کا جواب خود وزیراعظم شہباز شریف نے دے دیا۔

انہوں نے بتایا کہ میں نے آج مزارِ قائد پر مہمانوں کی کتاب میں لکھا، ’اے قائد! 74 سال میں ہماری جو کارکردگی رہی اس سے آپ کی روح کو تسکین نہیں پہنچی ہوگی، لیکن ہم کوشش کریں گے کہ آپ کی پیروی کریں اور پاکستان کو آپ کے خواب کے مطابق تصویر بنائیں۔’

ایک روزہ دورے پر کراچی میں موجود وزیراعظم شہباز شریف نے وزیراعلیٰ سندھ مراد علی شاہ سے بھی ملاقات کی۔

وزیراعظم نے پریس کانفرنس میں کہا کہ میں نے مراد علی شاہ کو یقین دلایا ہے وفاقی حکومت کی جانب سے ان کے ساتھ ہر ممکن تعاون کیا جائے گا۔

انہوں نے کہا کہ میں نے مراد علی شاہ صاحب سے دو، تین گزارشیں کی ہیں، ایک یہ کہ کراچی سرکولر ریلوے (کے سی آر) منصوبے کو سی پیک کا حصہ بنوائیں، شروع میں چائنیز اتھارٹی نے اسے سی پیک میں شامل کرنے پر غور کرنے کا اشارہ بھی دیا تھا لیکن اس کے بعد حالات بدل گئے، ان شا اللہ ہم پوری کوشش کریں گے کہ اسے سی پیک کا حصہ بنانے کے لیے چینی حکومت سے درخواست کریں گے۔

انہوں نے کہا کہ کراچی میں پینے کے پانی کا مسئلہ بہت بڑا چیلنج ہے، اس کے لیے ہم نے بڑی تفصیل سے گفتگو کی، کراچی میں پینے کے پانی کی جتنی بھی طلب ہے اس کا نصف 2024 تک پورا کرنے کا منصوبہ بنایا گیا تھا، میں نے متعلقہ ذمہ داران اور مراد علی شاہ کو گزارش کی ہے کہ نصف نہیں مکمل طلب کو 2024 تک پورا کیا جائے۔

وزیراعظم کا مزید کہنا تھا کہ میں نے مراد علی شاہ صاحب کو تجویز دی کہ کراچی کے لیے ہزاروں کی تعداد میں ایئر کنڈیشن بسیں منگوائی جائیں، اچھی شہرت کے حامل ٹرانسپورٹز کو ساتھ ملا کر اس منصوبے کو آگے بڑھایا جائے اور اس پر سروس چارجز کو وفاقی اور صوبائی حکومت مل کر برداشت کرے تو یہ ٹرانسپورٹرز کے لیے بھی بہت مفید ہوگا۔

بطور وزیر اعظم، شہباز شریف کا یہ پہلا دورہ کراچی ہے، اس موقع وزیر اعظم کے ہمراہ شاہد خاقان عباسی، مریم اورنگزیب اور احسن اقبال سمیت مسلم لیگ (ن) کے دیگر اراکین پارلیمنٹ بھی موجود ہیں۔