پنجاب فوڈ اتھارٹی کی جانب سے ملاوٹی خوراک بیچنے والوں کے خلاف کریک ڈاؤن کیا گیا ہے۔

تفصیلات کے مطابق کارروائیاں ملتان، میاں چنوں، بوریوالا اور لودھراں میں پاپڑ فیکٹریز، سوڈا واٹر پلانٹس، کریانہ سٹورز اور بیکریز پر کی گئیں۔

کارروائیوں کے نتیجے میں 150 لٹر ناقص محلول، 40 کلو ملاوٹی سرخ مرچیں، 48 لٹر غیر معیاری سوڈا واٹر اور 12 کلو ایکسپائرڈ سویاں تلف کردی گئی ہیں۔

ڈی جی فوڈ اتھارٹی شعیب خان جدون نے کہا کہ   پاپڑ کھار، مضر صحت کیمیکل سے تیار محلول سے پاپڑ تیار کرنے پر مظفر گڑھ روڈ پر فیکٹری کو 40 ہزار روپے جرمانہ عائد کیا گیا ہے۔

 ڈی جی فوڈ اتھارٹی نے بتایا کہ کیمیکل ڈرمز میں اسٹوریج، خام مال میں مردہ حشرات اور صاف پانی کا استعمال نہ کرنے پر پاپڑ فیکٹری کو جرمانہ کیا گیا۔

شعیب خان جدون نے کہا کہ خانیوال میں اڈہ 12 اے ایچ میں کریانہ اسٹور کو ملاوٹی سرخ مرچیں فروخت کرنے پر 10 ہزار روپے جرمانہ کردیا گیا ہے۔

 ڈی جی فوڈ اتھارٹی کا کہنا تھا کہ مصنوعی مٹھاس کی ملاوٹ، نامکمل لیبلنگ کرنے پر بوریوالا میں 2 سوڈا واٹر پلانٹس کو 12، 12 ہزار کے جرمانے کردیے گئے ہیں۔

 ڈی جی فوڈ اتھارٹی نے مزید کہا کہ لودھراں میں سوڈا واٹر کی تیاری کھلے اجزاء کی ملاوٹ کرنے پر کہروڑپکا میں پلانٹ کو 14 ہزار جرمانہ کردیا گیا ہے۔