خادم حرمین شریفین شاہ سلمان بن عبدالعزیز کی سرپرستی میں عرب مالیاتی اداروں کے مشترکہ سالانہ اجلاس کا افتتاح سعودی وزیرِ خزانہ محمد الجدعان نے جمعرات کو جدہ میں کیا۔

غیر ملکی خبررساں ادارے  کے مطابق اجلاس میں عرب ممالک کے وزرائے خزانہ و عرب مالیاتی اداروں کی کونسلز کے ارکان و سربراہ  بشمول عرب سینٹرل بینکوں کے گورنرز اور فنڈنگ کے عرب اداروں کے ڈائریکٹرز نے شرکت کی۔اجلاس میں عالمی مالیاتی فنڈ، بین الاقوامی بینک گروپ، اسلامی ترقیاتی بینک کے نمائندوں سمیت مالیاتی و اقتصادی شعبوں کے متعدد ماہرین بھی موجود تھے۔ اجلاس کے شرکاء نے عرب ممالک میں عظیم الشان ترقیاتی منصوبوں کی مالی و تکنیکی مدد اورمشترکہ عرب جدوجہد کے فروغ میں تعاون کے حوالے سے مالیاتی اداروں کی سرگرمیوں کا جائزہ لیا ۔

انہوں نے عرب ممالک کو درپیش چیلنجز سے نمٹنے کے طریقوں اور مشترکہ عرب مالیاتی اداروں کے پیش کردہ ورکنگ پیپرز ، مجوزہ منصوبوں اور نئے اقدامات پر بھی تبادلہ خیال کیا۔

سعودی وزیر خزانہ نے اجلاس میں شریک وفود کے سربراہوں اور ارکان کو خادم حرمین شریفین کی جانب سے خیر سگالی اور رمضان کی مبارکباد کا پیغام پہنچایا۔

وزیر خزانہ کا کہنا تھا کہ سعودی عرب مشترکہ عرب جدوجہد کی مدد کرتا رہا ہے اور آئندہ بھی کرتا رہےگا ۔ مملکت علاقائی، ترقیاتی اداروں کے توسط سے عرب ممالک کے درمیان اقتصادی تعلقات کے استحکام میں اپنا کردار ادا کرنے کے حوالے سے پرعزم ہے ۔ مملکت نے انسانی بحرانوں سے نمٹنے کے سلسلے میں ہمیشہ تعاون کیا جو آئندہ بھی جاری رہے گا ۔

وزیر خزانہ نے اس بات پر مسرت کا اظہار کیا کہ اکثر عرب ممالک کورونا وباء کے اثرات سے نکلنے لگے ہیں ۔شرح نمو بحال ہونے لگی ہے ۔ عرب مالیاتی فنڈ کے تخمینے بتا رہے ہیں کہ 2022 کے دوران عرب ممالک کی معیشت میں مجموعی شرح نمو پانچ فیصد ہو گی جبکہ 2021 میں شرح نمو لگ بھگ 3 فیصد تھی۔