رینجرز کا بلوچ عمائدین کے تعاون سے فٹبال ٹورنامنٹ کا انعقاد کیا گیا ہے۔

تفصیلات کے مطابق پاکستان رینجرز(سندھ)نے بلوچ کمیونٹی کے تعاون سے منگھو پیر فٹبال گراؤنڈ کراچی میں فٹبال ٹورنامنٹ کا انعقاد کیا ہے۔

ترجمان سندھ رینجرز نے بتایا کہ ٹورنامنٹ میں کل  8 ٹیموں نے شرکت کی، فائنل میچ میں ڈی جی رینجرز (سندھ) میجر جنرل افتخار حسن چوہدری نے بطور مہمان خصوصی شرکت کی۔

ترجمان سندھ رینجرز نے کہا کہ فٹبال فائنل میچ کا مقابلہ منگھو پیر یونین اورمہر اسپورٹس کی ٹیموں کے درمیان کھیلا گیا جو مہر اسپورٹس کی ٹیم نے دلچسپ مقابلے کے بعد پینلٹی شوٹس کے ذریعے جیت لیا۔

 ڈی جی رینجرز نے کھیلوں اور دیگر میدان میں بلوچ کمیونٹی کے کردار کو سراہا اور کہا کہ ہم سب کو لسانی تشخص سے بالاتر ہو کر ملک کی ترقی میں کردار ادا کرنا ہو گا،

انہوں نے کہا کہ کراچی ملک کی معیشت کے لیے ریڑھ کی ہڈی کی حیثیت رکھتا ہے،کراچی میں امن کو برقرار رکھنے کے لیے رینجرز اپنا کردار ادا کرتے رہیں گے۔

 تقریب میں مختلف مکاتب فکر اورشعبہ ہائے زندگی سے تعلق رکھنے والی اہم سول، سیاسی، سماجی شخصیات،سول انتظامیہ اوررینجرزکے اعلیٰ افسران نے شرکت کی۔

بلوچ کمیونٹی نے سندھ بالخصوص کراچی میں امن و امان قائم رکھنے میں رینجرز کی کاوشوں پر اعتماد کا اظہار کیا اور اپنے بھرپور تعاون کا یقین دلایا۔

واضح رہے کہ مقابلے کے اختتام پر مہمان خصوصی نے رنر اپ اور ونر ٹیم کے کھلاڑیوں میں ٹرافی اور انعامات تقسیم کیے۔