قومی اسمبلی کے اجلاس میں وزیراعظم کے خلاف عدم اعتماد پر ووٹنگ میں تاخیر ہونے کی وجہ سے اپوزیشن نے برہمی کا اظہار کیا ہے۔

 اس حوالے سے ذرائع کا کہنا ہے کہ اجلاس میں اگر آج ووٹنگ کا عمل نہ کروانے کی صورت میں ایک بار پھر سے اپوزیشن حکومت کے خلاف عدالت میں جائیگی۔

ذرائع کے مطابق اپوزیشن کا کہنا ہے کہ ووٹنگ نہ ہونے کی صورت میں ہمارے پاس ہائی کورٹ اور سپریم کورٹ جانے کا آپشن موجود ہے۔

اپوزیشن لیڈرز کا کہنا ہے کہ عدالت میں اسپیکر اور حکومت کے خلاف توہین عدالت کی درخواست دینگے۔

خیال رہے کہ اسد قیصر کی صدارت میں چلنے والا اجلاس دوپہر 12:30 بجے تک ملتوی کیا گیا تھا تاہم اب یہ اجلاس بعد نماز ظہر شروع ہونے کا امکان ہے۔

اجلاس ملتوی ہونے کے بعد اپوزیشن ارکان کی اسپیکر قومی اسمبلی سے ملاقات ہوئی جس میں پہلے عدم اعتماد پر ووٹنگ کروانے پر زور دیا گیا ہے۔

علاوہ ازیں قومی اسمبلی کا اجلاس ملتوی ہونے کے بعد بلاول بھٹو زرداری نے راجا پرویز اشرف اور نوید قمر سمیت دیگر پیپلز پارٹی رہنماؤں کے ہمراہ اسپیکر قومی اسمبلی اسد قیصرسے ملاقات کی۔

بلاول بھٹو زرداری نے اسپیکر قومی اسمبلی سے کہا کہ عدالتی فیصلے پر عمل درآمد اسپیکر کی ذمہ داری ہے، فیصلے کے مطابق ووٹنگ آج ہی ہونی ہے۔

چیئرمین پیپلز پارٹی نے کہا کہ وزیراعظم کے خلاف تحریک عدم اعتماد پر ووٹنگ میں تاخیر نہ کی جائے، اگر وہ ووٹنگ نہیں کروائیں گے تو سپریم کورٹ کے حکم کی توہین ہوگی۔

جواب میں اسپیکر قومی اسمبلی نے کہا کہ سپریم کورٹ کے حکم پر اجلاس بلایا گیا ہے، جو بھی کروں گا قوائد و ضوابط اور عدالتی فیصلے کی روشنی کے تحت ہی کروں گا۔