مریم اورنگزیب نے کہا ہے کہ عمران صاحب تین مہینے میں جیل جانے کی تیاری کریں۔

پاکستان مسلم لیگ (ن) کی ترجمان مریم اورنگزیب نے عمران خان کے بیان پر ردعمل دیتے ہوئے کہا ہے کہ عمران خان صاحب آپ ملک میں الیکشن نہیں فساد افراتفری اور انارکی چاہتے ہیں۔

انہوں نے کہا کہ عمران صاحب آئین توڑنے والوں کو الیکشن میں لڑنے کی اجازت نہیں ہوتی، عمران صاحب تین مہینے میں الیکشن نہیں، جیل جانے کی تیاری کریں، آئین صرف اپنی لوٹ مار اور نالائقی و نااہلی کو چھپانے کے لئے توڑا۔

مریم اورنگزیب نے کہا ہے کہ آئین توڑ کر آپ نے اپنی سیاسی قبر کھودی ہے، عمران خان نے نیشنل سیکیورٹی میٹنگ کا سہارا لے کر آئین پہ حملہ کیا ہے، عمران صاحب نے نیشنل سیکیورٹی کا فورم استعمال کر کے 197 عوامی نمائندوں کو غدار قرار دیا۔

پاکستان مسلم لیگ (ن) کی ترجمان نے کہا کہ اگر نیشنل سیکیورٹی میٹنگ میں 197 لوگوں کی غداری کے ثبوت عوام کے سامنے پیش کریں، ملک آج عمران خان کی ضد پہ چل رہا ہے، آئین پر نہیں۔

انہوں نے کہا کہ عمران صاحب جیل اب آپ جائیں گے اور وہ بھی آئین توڑنے کے جرم میں، عمران صاحب سہی کہہ رہے ہیں بیرونِ ملک سازش ہوئی لیکن عمران خان نے کی ہے۔

مریم اورنگزیب نے کہا ہے کہ آپ نے بیرونِ ملک سے غیر قانونی فارن فنڈنگ لے کر معیشت تباہ کی، بیرونِ ملک سے غیر قانونی فارن فنڈنگ لے کر ملک کو لوٹا، بیرونِ ملک سے غیر قانونی فارن فنڈنگ لے کر ملک کو 52000 ارب کا مقروض کر دیا گیا۔

پاکستان مسلم لیگ (ن) کی ترجمان نے کہا کہ بیرونِ ملک سے غیر قانونی فنڈنگ لے کر عوام کو بھوکا، بے روزگار اور غریب کیا، بیرونِ ملک سے غیر قانونی فنڈنگ لے کر ملکی معاشی سلامتی کو آئی ایم ایف کے حوالے کیا۔

انہوں نے کہا کہ اتحادیوں نے اور آپ کے لوگوں نے آپ کو آپ کی کرتوتوں کی وجہ سے چھوڑا ہے، غیر آئینی ، آئین شکن اور آئین پہ حملہ کرنے والے کی تقاریر پہ پاپندی لگائی جائے، عمران خان کی انّا ، تکبر اور ضد نے 22 کروڑ عوام کو یرغمال بنایا ہوا ہے۔