لگتا یوں ہے کہ درد ہماری زندگی کا حصہ بن چکا ہے اور ہر عمر کے افراد پر یکساں حملہ آور ہے۔ اب ایک ویئریبل ایجاد کی بدولت درد کے ہر مقام پر فوری آرام حاصل کیا جاسکتا ہے اور اس کے ساتھ ہی تناؤ بھی دور کیا جاسکتا ہے۔

اس کا نام سیڈزی ہے جو اس وقت کراؤڈ فنڈنگ کے مراحل سے گزررہا ہے۔ سیڈزی الیکٹرونک پہناوا یعنی ویئرایبل ہے اور وہ تین طرح سے آپ کی زندگی آسان بناسکتا ہے۔

اسے دیرینہ درد مٹانے کے لیے بنایا گیا ہے اور سائنسی طور پر اس کی افادیت سامنے آچکی ہے۔ امریکہ اور برطانیہ میں بہت سے طبی انسٹی ٹیوٹ میں اس کی آزمائش کی گئی ہے اور یوں ڈاکٹر بھی اسے تجویز کررہے ہیں۔

اسے بنانی والی کمپنی نے درست کہا ہے کہ پوری دنیا میں کئی افراد روزانہ کی بنیاد پر کمپیوٹر پر کام کرتے ہیں اور اسکرین سے جڑے رہتے ہیں۔ اس سے پٹھوں میں تکلیف اور جکڑن پیدا ہوتی ہے اور یوں وہ دھیرے دھیرے دیرینہ مرض میں ڈھل جاتی ہے۔

سیڈزی تین طرح سے کام کرتا ہے اول اس میں انفراریڈ شعاعیں موجود ہیں، دوم یہ حرارت کی بنا پر تھرمل تھراپی کرتا ہےاور سوم اس میں اروما تھراپی یعنی خوشبوئیات سے علاج کا آپشن موجود ہے۔ الیکٹرومیگنیٹک تھرمل تھراپی اور فار انفراریڈ رے تھراپی (ایف آئی آر) ایسی طولِ موج کی شعاعیں ہیں جن کے شفائی خواص مسلمہ ہے اور سائنسی طور پر ثابت ہوچکے ہیں۔ یہ فزیوتھراپی کی طرح کام کرتے ہیں اور درد بھگاتے ہیں۔

پھر لائٹ تھراپی یعنی روشنی سے علاج کے سائنسی ثبوت بھی مل چکے ہیں اور یہ آلہ انفراریڈ شعاعیں خارج کرتا ہے اور درد کو ٹھیک کرتا ہے۔

تیسرا اہم پہلو اروما تھراپی ہے جو تیل اور خوشبو سے علاج کا نام ہے۔ یہ علم چین اور جنوب مشرقی ایشیا میں ہزاروں برس سے رائج ہے۔ اروما تھراپی کا سب سے ہم کام زہرربائی یا ڈی ٹاکسی فکیشن ہے اور جب یہ انفراریڈ اور تھرمل تھراپی کے ساتھ ملتا ہے تو تین طرح سے درد اور تناؤ میں کمی ہوتی ہے۔

دو آلات کے سیٹ کی قیمت 240 ڈالر رکھی گئی ہے۔