اسلام آباد ہائی کورٹ نے عید الفطر کی تعطیلات کے دوران اہم مقدمات کی سماعت سے متعلق بڑا فیصلہ کیا ہے۔

اسلام آباد ہائی کورٹ کی جانب سے غیر معمولی وضاحت جاری کی گئی ہے جس میں کہا گیا ہے ہائی کورٹ عید کی چھٹیوں میں بھی انتہائی اہم نوعیت کے کیسز کی صورت میں دستیاب ہو گی۔

عدالت عالیہ کی جانب سے جاری سرکلر میں کہا گیا ہے کہ کسی بھی قسم کی انتہائی ہنگامی صورت حال میں عید کی چھٹیوں کے دوران بھی کیس دائر ہو سکے گا اور عدالت کیسز کو دیکھ کر ان پر حکم جاری کرنے کے لیے دستیاب ہو گی۔

سرکلر کے مطابق کیس دائر کرنے کا مجوزہ طریقہ کار ہائی کورٹ کی ویب سائٹ پر موجود ہے ، فروری 2022 کے نوٹی فکیشن میں 4 افسران میں سے کسی سے موبائل پر رابطہ کیا جا سکتا ہے۔

رواں ماہ 9 اور 10 اپریل کی درمیانی رات قومی اسمبلی میں تحریک عدم اعتماد پر ووٹنگ کے دوران رات گئے عدالتیں کھلنے کی خبریں سامنے آئی تھیں۔

پی ٹی آئی کے چیئرمین عمران خان اور ان کے ساتھی بارہا یہ کہہ چکے ہیں کہ انہوں نے ایسا کیا جرم کیا تھا کہ رات کو عدالتیں کھلی تھیں۔

بعد ازاں اسلام آباد ہائی کورٹ کے چیف جسٹس اطہر من اللہ نے ایک کیس کی سماعت کے دوران ریمارکس دیئے تھے کہ عدالتیں اپنے مقررہ وقت کے بعد بھی اہم مقدمات کی سماعت کرتی ہیں۔