اینٹی نارکوٹکس فورس (اے این ایف) کی جانب سے لاہور علامہ اقبال انٹرنیشنل ایئرپورٹ کارگو پر کارروائی کی گئی ہے۔

تفصیلات کے مطابق اے این ایف نے کارروائی کے نتیجے میں لاہور ایئرپورٹ پر موجود کارگو کمپنی کے ذریعے نیوزی لینڈ منشیات اسمگلنگ کی کوشش ناکام بنا دی گئی۔

ترجمان اے این ایف نے بتایا کہ پینٹ برش کے سامان پر مشتمل پارسل سے بھاری مقدار میں آئس برآمد ہوئی جبکہ برآمد ہونے والی آئس کو پینٹ برشوں میں مہارت سے چھپایا گیا تھا۔

ترجمان اے این ایف نے مزید بتایا کہ پارسل گجرانوالہ سے زین کی جانب سے بک کروایا گیا تھا جبکہ پارسل نیوزی لینڈ میں مقیم ماٸیک کارٹر نامی شخص کو موصول ہونا تھا۔

واضح رہے کہ منشیات قبضے میں لیکر مزید تحقیقات کا آغاز کر دیا گیا ہے۔

خیال رہے کہ کچھ روز قبل بھی اے این ایف انٹیلیجنس نے کراچی میں بڑی کارروائی کی تھی جس کے نتیجے میں منشیات کا دھندا کرنے والے نیٹ ورک کے تین کارندے گرفتار کر لئے گئے تھے۔

کارروائی کے دوران ملزمان سے  94.800 کلوگرام چرس برآمد ہوئی جبکہ مجموعی طور پر 1200 گرام چرس کے 79 پیکٹ برآمد ہوئے اور جوہر چورنگی کے قریب دورانِ تلاشی رکشہ سے 2 پیکٹ چرس برآمد ہوئی تھی۔

اے این ایف کے حکام نے بتایا تھا کہ گرفتار ملزمان بلوچستان اور پشاور سے منشیات کراچی اسمگل کر کے مقامی منشیات فروشوں کو فروخت کرتے ہیں۔