پاکستان میں اس وقت نوجوانوں میں برین ہیمرج کے کیسز میں ہولناک حد تک اضافہ دیکھنے میں آیا ہے۔

آج جانتے ہیں کہ برین ہیمرج کیا ہے اور اس کے کیسز میں اضافے کی وجوہات کیا ہیں۔

برین ہیمرج فالج کی ایک قسم ہے اور یہ دماغ کی شریان پھٹنے اور آس پاس کی بافتوں میں خون بہنے کی وجہ سے ہوتا ہے۔

برین ہیمرج میں خون دماغی خلیات کو تباہ کر دیتا ہے اور تقریباً 13 فیصد کیسز فالج کا باعث بنتے ہیں۔

برین ہیمرج کی کئی اقسام ہیں، پہلی قسم کو انٹراکرینیل ہیمرج یا انٹرا سیریبرل ہیمرج  کہا جاتا ہے اس میں سر کے اندر خون بہنے لگتا ہے۔

اس کے علاوہ سیریبرل ہیمرج میں دماغ کے اندر یا ارگرد خون بہنے لگتا ہے، اسی طرح Subarachnoid ہیمرج سے دماغ اور حرام مغز کو ڈھانپنے والی جھلیوں کے درمیان خلاء پیدا ہوجاتا ہے۔

برین ہیمرج دماغ میں شریان پھٹنے سے ہوتا ہے جس سے خون کی فراہمی منقطع ہوجاتی ہے اور پھٹی ہوئی شریانوں سے خون رس رس کر دماغ کے نازک اور حساس حصوں میں پہنچنا شروع ہوجاتا ہے جس سے مریض کوما کی کیفیت میں چلا جاتا ہے۔

اس کے علاوہ بلڈ پریشر میں اضافہ کسی بھی انسان کو برین ہیمرج کی طرف لے جاسکتا ہے اس لیے ہمیشہ یہ خیال رکھنا ضروری ہے کہ بلڈ پریشر 130/200 سے اوپر نہ جائے اور اچانک آپ کا بلڈپریشر ان ہندسوں کو عبور کرجائے تو شریانیں دباؤ کی وجہ سے پھٹ سکتی ہیں۔

ماہرین صحت کے مطابق برین ہیمرج میں دماغی شریان پھٹ جاتی ہے جس سے دماغ کو نقصان پہنچتا ہے اور یہ مرض جان لیوا بھی ہوسکتا ہے ایسے مریض کی جان بچنے کا انحصار اس بات پر ہوتا ہے کہ کھوپڑی کے اندر سوجن اور خون بہنے کو کتنی جلدی کنٹرول کیا جاتا ہے۔

یعنی کچھ لوگوں پر تو اس کے اثرات مستقل ہوسکتے ہیں جبکہ کچھ مکمل طور پر صحتیاب بھی ہوسکتے ہیں۔

اگر آپ اچانک چونک جاتے ہیں، پڑھنے میں دقت پیش آتی ہے، اچانک سر میں شدید درد اٹھتا ہے، ہاتھ، ٹانگ یا چہرہ سن محسوس ہوتا ہے، جسم میں سنسناہٹ، سستی یا غنودگی محسوس ہوتی ہے تو آپ ذہنی کمزوری کا شکار ہوسکتے ہیں جو آگے چل کر برین ہیمرج کا سبب بن سکتی ہے۔

پاکستان میں ہر خاص و عام میں ڈپریشن کا مرض تیزی سے بڑھتا جا رہا ہے، عموماً یہ دیکھا گیا ہے کہ لوگ جلدی دلبرداشتہ ہو جاتے ہیں جبکہ ذہنی تناؤ کا انجام ڈپریشن کی صورت میں نکلتا ہے جو برین ہیمرج کو دعوت دیتا ہے۔

طبی ماہرین کا کہنا ہے کہ جسم میں بڑھتا کولیسٹرول بھی دماغی صحت پر منفی اثر ڈالتا ہے اس لیے کھانے میں بے اعتدالی، جسمانی کسرت سے فرار اور نیند کی کمی بھی دماغی صحت کو متاثر کرکے برین ہیمرج کی راہ ہموار کرتی ہے۔

اس کے علاوہ سر میں لگنے والی چوٹ، منشیات کا استعمال، تمباکو نوشی اور خون پتلا کرنے والی ادویات بھی انسان کو برین ہیمرج کی طرف دھکیل سکتی ہیں۔

طبی ماہرین کے مطابق پاکستان میں برین ہیمرج میں اضافے کی وجہ تناؤ، بلڈپریشر، شوگر اور لیور فنکشن متاثر ہونا اور فاسٹ فوڈ کا بڑھتا ہوا رجحان ہے جس سے جسم میں کولیسٹرول کی سطح بہت زیادہ بڑھ جاتی ہے۔

ماہرین صحت کا کہنا ہے کہ نوجوانوں کو ورزش کو اپنی زندگی کا معمول بنانا اور فاسٹ فوڈ سے گریز کرنا چاہئیے۔