وفاقی وزیر اسد عمر نے کہا ہے کہ کے پی کے میں ہونے والے الیکشن  کے نتائج نے ثابت کیا ہے قوم اپنے لیڈر کے ساتھ کھڑی ہے۔

 سماجی رابطے کی ویس سائٹ پر اپنے ایک پیغام میں وفاقی وزیر اسد عمر نے کے پی کے الیکشنز کے نتائج کے حوالے سے بات کی ہے۔

خیبر پختون خواہ کے الیکشن میں تحریک انصاف کی بھاری کامیابی نے ثابت کردیا کے قوم اپنے غیرت مند لیڈر کے ساتھ کھڑی ہو گئی ہے. اب فیصلہ عدم اعتماد تحریک کا نہیں ہونا . اب فیصلہ یہ ہونا ہے کے پاکستان کے عوام اپنے مستقبل کا فیصلہ کریں گے یا چند ضمیر فروش سیاست دان اور ان کے بیرونی آقا

— Asad Umar (@Asad_Umar) April 1, 2022

 انہوں نے کہا کہ خیبر پختون خواہ کے الیکشن میں تحریک انصاف کی بھاری کامیابی نے ثابت کردیا کے قوم اپنے غیرت مند لیڈر کے ساتھ کھڑی ہو گئی ہے۔

 ان کا کہنا تھا کہ عوام کے اس فیصلے کے بعد اب صرف عدم اعتماد کا فیصلہ نہیں ہونا ہے بلکہ اب پاکستان کے عوام اپنے مستقبل کا فیصلہ خود کریں گے۔

خیال رہے کہ گزشتہ روز وزیراعظم عمران خان نے اپنے خطاب میں واضح کیا تھا کہ اتوار کے دن پاکستان کی عوام کے مستقبل کا فیصلہ ہونا ہے۔

 انہوں نے بتایا تھا کہ قومی اسمبلی میں اتوار کے روز عدم اعتماد کی تحریک پر ووٹنگ ہوگی ۔

قوم سے خطاب کرتے ہوئے کہا تھا کہ اتوار کو فیصلہ ہو جائے گا آیا ملک آزاد خارجہ پالیسی پر عمل کرے گا یا غلامی کی پالیسی اپنائے گا۔

انہوں نے کہا کہ حزب اختلاف کے رہنما براہ راست اس میں ملوث ہیں جس کا مقصد پاکستان کی خود مختاری کو کمزور کرنا ہے۔ انہوں نے کہا کہ یہ رہنما عدالتوں سے سزا یافتہ اور کرپشن میں ڈوبے ہوئے ہیں اور ایک مہذب قوم کیسے ان کو رہنمائی کی اجازت دے گی۔