وزیراعظم شہباز شریف نے کہا ہے کہ آئیے ہم سب امن اور محبت کے مشترکہ پیغام کو پھیلائیں۔

سماجی رابطے کی ویب سائٹ ٹوئٹر پر شہباز شریف نے  ایسٹر کے موقع پر اپنے جاری کردہ ٹوئٹ پیغام میں لکھا کہ پاکستان اور دنیا بھر کی مسیحی برادری کو ایسٹر کی خوشیاں مبارک ہوں۔

Happy Easter to the Christian community in Pakistan & around the world. We greatly value & laud the services that our Christian Pakistanis have rendered in all walks of life since the creation of Pakistan. Let us all spread the shared message of peace, inclusivity & love.

— Shehbaz Sharif (@CMShehbaz) April 17, 2022

جاری کردہ ٹوئٹ میں وزیراعظم لکھتے ہیں کہ ہم ان خدمات کی بہت قدر اور تعریف کرتے ہیں جو ہمارے عیسائی پاکستانیوں نے قیام پاکستان کے بعد سے زندگی کے تمام شعبوں میں انجام دی ہیں۔

انہوں نے مزید لکھا کہ آئیے ہم سب امن، شمولیت اور محبت کے مشترکہ پیغام کو پھیلائیں۔

دنیا بھر کی مسیحی برادری آج ایسٹر کا تہوار مذہبی جوش و جذبے سے منا رہی ہے۔

ایسٹر سنڈے دنیا بھر میں عیسائیوں کے تہواروں میں سے ایک ہے جو بائبل کے مطابق حضرت عیسیؑ کو 2 ہزار سال پہلے یروشلم سے زندہ اٹھائے جانے کی یاد میں منایا جاتا ہے۔

ایسٹر کے موقع پر گرجا گھروں میں خصوصی عبادات کا اہتمام کیا گیا ہے۔ ویٹی کن سٹی میں بھی ایسٹر کی دعائیہ تقریب کا انعقاد ہوا جہاں عیسائیوں کے مذہبی پیشوا پوپ فرانسس نے دنیا میں پائیدار امن کے لیے حاضرین میں خصوصی دعا کرائی۔

پوپ فرانس نے یوکرین جنگ کے متاثرین کو حوصلہ دیتے ہوئے کہا کہ وہ جنگ کے اندھیروں میں روشنی کی کرن تلاش کریں۔

دنیا کے مختلف حصوں میں رہنے والے مسیحی گرجا گھروں میں دعائیہ تقریبات میں شریک ہیں جہاں امن، ترقی اور خوشحالی کے لیے خصوصی دعائیں کی جا رہی ہیں۔