عاصم افتخار نے کہا ہے کہ پاکستان اور سعودی عرب کے برادرانہ تعلقات باہمی اعتماد پر مبنی ہیں۔

ترجمان دفتر خارجہ عاصم افتخار نے وزیراعظم شہباز شریف کے دورہ سعودی عرب کے حوالے سے گفتگو کرتے ہوئے کہا ہے کہ سعودی عرب کے ولی عہد شہزادہ محمد بن سلمان بن عبدالعزیز کی دعوت پر وزیراعظم محمد شہباز شریف 28 سے 30 اپریل 2022 تک سعودی عرب کا دورہ کریں گے۔

انہوں نے کہا کہ رواں ماہ میں عہدہ سنبھالنے کے بعد وزیراعظم کا یہ پہلا بیرون ملک کا دورہ ہوگا، وزیراعظم کے ہمراہ کابینہ کے اہم ارکان سمیت اعلیٰ سطح کا وفد بھی سعودی عرب کا دورہ کرے گا۔

عاصم افتخار نے کہا کہ دورے کے دوران وزیراعظم سعودی قیادت کے ساتھ دوطرفہ بات چیت کریں گے، اقتصادی، تجارتی اور سرمایہ کاری کے تعلقات کو آگے بڑھانے اور سعودی عرب میں پاکستانی افرادی قوت کے لیے زیادہ مواقع پیدا کرنے پر توجہ مرکوز کی جائے گی۔

ترجمان دفتر خارجہ نے کہا ہے کہ دونوں فریقین باہمی دلچسپی کے متعدد علاقائی اور بین الاقوامی امور پر بھی تبادلہ خیال کریں گے، پاکستان اور سعودی عرب کے برادرانہ تعلقات باہمی اعتماد ،قریبی تعاون اور ایک دوسرے کی حمایت کی لازوال روایت پر مبنی ہیں۔

انہوں نے کہا کہ سعودی عرب میں 20 لاکھ سے زائد پاکستانی آباد ہیں، جو دونوں برادر ممالک کی ترقی، خوشحالی اور معاشی ترقی میں اپنا کردار ادا کر رہے ہیں، وزیراعظم کے دورہ سعودی عرب سے مختلف شعبوں میں دوطرفہ تعاون کو مزید گہرا کرنے اور دونوں ممالک کے درمیان بڑھتی ہوئی شراکت داری کو مزید تقویت ملے گی۔