قومی ایئرلائن (پی آئی اے) کا طیارہ حادثے سے بال بال بچ گیا ہے۔

تفصیلات کے مطابق پی آئی اے کی پرواز پی کے 9759 لاہور سے جدہ کیلئے اڑان بھری تھی، اڑان بھرنے کے کچھ ہی دیر بعد بوئنگ 777 طیارے کی ونڈ اسکرین میں اچانک کریک پڑ گیا جس کے باعث طیارہ حادثے سے بال بال بچ گیا۔

دوسری جانب کپتان نے کراچی کنٹرول ٹاور سے رابطہ کر لیا ہے اور کراچی ایئرپورٹ پر لینڈنگ کی اجازت طلب کر لی ہے۔

ترجمان پی آئی اے نے بتایا کہ لاہور سے جدہ جانے والی پرواز پی کے 9759 سے پرندہ ٹکرایا جس کی وجہ سے آوٹر ونڈ اسکرین ٹو ٹ گئی۔

ترجمان کا کہنا ہے کہ طیارے کو مرمت کے لئے ہنگر منتقل کر دیا گیا ہے جبکہ مسافروں کو متبادل پرواز سے دوپہر 2بجے جدہ روانہ ہو سکیں گے۔

واضح رہے کہ پرواز میں 300 سے زائد مسافر سوار ہیں۔

یہ بھی پڑھیں: پی آئی اے کا طیارہ اسلام آباد ائیرپورٹ پر حادثے کا شکار

خیال رہے کہ پی آئی اے 22 اپریل سے آسٹریلیا کے لیے براہ راست پروازوں کا آغاز کرے گا۔

 2 دن قبل سی ای او پی آئی اے ارشد ملک نے اپنے جاری کردہ ایک بیان میں کہا تھا کہ پی آئی اے نے 22 اپریل 2022 سے پاکستان سے سڈنی کے لیے براہ راست فلائٹ آپریشن شروع کرنے کی منصوبہ بندی مکمل کرلی۔

انہوں نے کہا کہ پروازیں ابتدائی طور پر جمعہ کو لاہور سے سڈنی اور اتوار کو سڈنی سے لاہور چلائی جائیں گی، آسٹریلیا کے دیگر 8 مقامات کے لیے ورجن آسٹریلیا ائر لائن کے ساتھ انٹر لائن ٹکٹ کا بھی انتظام کیا گیا ہے۔

ان کا کہنا تھا کہ پی آئی اے کے مسافروں کو سڈنی کے علاوہ آسٹریلیا کے مزید شہروں تک پہنچانے کے لئے ورجن آسٹریلیا ائیر لائن کے ساتھ انٹر لائن ٹکٹ کی سہولت کا بھی انتظام کیا گیا ہے۔

ارشد ملک نے کہا کہ انٹر لائن معاہدے سے سڈنی کے لئے پی آئی اے کی براہ راست پروازوں کے ساتھ آسٹریلیا میں مزید آٹھ مقامات کو بھی پی آئی اے کے مسافروں کے لئے قابل رسائی بنایا گیا ہے۔

انہوں نے کہا کہ انٹر لائن معاہدے سے پی آئی اے کے مسافر سڈنی کے علاوہ ورجن آسٹریلیا ائیر لائن کی پروازوں پر ایڈیلیڈ، برسبین، کینبرا، بالینا بائرن، ہوبارٹ، کیرنز اور پرتھ کے لئے بکنگ کر سکیں گے۔

ان کا کہنا تھا کہ مارکیٹنگ اور فرنٹ لائن ٹیموں کو مسافروں کو بہترین خدمات فراہم کرنے کی ہدایت کی ہے۔

سی ای او پی آئی اے ارشد ملک نے مزید کہا تھا کہ مسافر اب پی آئی اے کی ویب سائٹ، پی آئی اے کے آفیشل سیل اور اینڈرائیڈ ایپ، پی آئی اے کال سینٹر اور پی آئی اے ٹریول ایجنٹس کے ذریعے بھی پروازیں بک کر سکتے ہیں۔