ایڈیشنل آئی جی کراچی غلام نبی میمن نے کہا ہے کہ جرائم کے منعظم گروہوں کے خلاف مؤثر انداز میں کام جاری ہے۔

بول نیوز کے ڈپٹی بیورو چیف شعیب برنی سے خصوصی بات چیت کرتے ہوئے ایڈیشنل آئی جی کراچی نے بتایا کہ کراچی میں کرائم کو کنٹرول کرنے کے لیے پروایکٹیو پولسنگ کی ضرورت تھی جس پر عمل درآمد کیا جارہا ہے۔

ایڈیشنل آئی جی کراچی نے کہا کہ بار بار جرائم کی واردتوں میں ملوث ملزمان کا  کریمنل ریکارڈ مرتب کرنے سے فائدہ ہوا ہے، کرائم کو کنٹرول کرنے کے لئے پولیس کے رسپارنس ٹائم میں بہتری لائے ہیں۔

انہوں نے کہا کہ کراچی کے تھانوں کی پولیس موبائلز کی پیٹرولنگ میں اضافہ کیا گیا ہے جبکہ کراچی میں 2022 جنوری سے  اپریل  کے رواں ماہ کے دوران 247  پولیس مقابلے ہوچکے ہیں۔

ایڈیشنل آئی جی کراچی غلام نبی میمن نے بتایا کہ رمضان المبارک میں جرائم کی واردتوں میں اضافہ ہوجاتا ہے اس کو روکنے کے لئے اقدامات کئے ہیں، رمضان میں مقامی ملزمان کے ساتھ ساتھ دوسرے شہروں سے کریمنل بھی واردتوں کے لئے کراچی کا رخ کرتے ہیں۔

انہوں نے کہا کہ حکومت نے سیکورٹی آف ولنربل اسٹیبلشمنٹ کا بہت اچھا لاء بنایا ہے اس کے آثرات سامنے آرہے ہیں، قانون آنے کے بعد ہم مختلف مارکیٹس ، مختلف ریسٹورنٹس ، مختلف بینکس کے پاس گئے۔

انہوں نے مزید کہا کہ جرائم کے منعظم گروہوں  کے خلاف مؤثر انداز میں کام جاری ہے، ہماری کوشش ہے ضمانت کے مرحلے کو مزید سخت کریں تاکہ بدمعاشوں کو فوری رہائی نہ مل سکے۔