ملک بھر میں موجود الیکشن کمیشن کے دفاتر کے باہر صوبائی سطح پر سیکیورٹی کے سخت انتظامات مکمل کرلئے گئے ہیں۔

تفصیلات کے مطابق پی ٹی آئی کی الیکشن کمیشن کے دفاتر کے باہر احتجاج کی کال کے بعد ای سی پی کی جانب سے وازرت داخلہ کو سیکیورٹی کے لئے خط لکھا گیا تھا۔

 وزارت داخلہ کے احکامات پر اسلام آباد میں ریڈ زون میں دفعہ 144 نافذ کردی گئی ہے جبکہ الیکشن کمیشن کو جانے والے تمام راستے بند کردیئے گئے ہیں۔

اسکے علاوہ صوبائی سطح پولیس کی بھاری نفری الیکشن کمیشن کے باہر تعینات کردی گئی ہے جبکہ قیدی وین اور واٹر کینن بھی الیکشن کمیشن دفتر کے باہر پہنچا دی گئیں ہیں۔

الیکشن کمیشن کو جانے والا راستہ خاردار تاریں لگا کر بند کر دیا گیا ہے۔

خیال رہے کہ  پی ٹی آئی کے چیئرمین عمران خان نےآج دوپہر 12 بجے الیکشن کمیشن پنجاب کے دفتر کے سامنے احتجاج  کرنے کی کال دی ہے۔

انہوں نے بتایا ہے کہ الیکشن کمیشن سے منحرف ارکان کے خلاف ریفرنس کے فیصلے میں تاخیر پر احتجاج کیا جائے گا جو کہ پرامن طور پر کیا جائیگا۔

خیال رہے کہ احتجاجی مظاہر ے کی قیادت سابق وزراء ڈاکٹر یاسمین راشد، میاں محمودالرشید، میاں اسلم اقبال ڈاکٹر مراد راس کریں گے۔

یاد رہے کہ پاکستان تحریک انصاف کی جانب سے پنجاب اسمبلی میں موجود منحرف ارکان کے حوالے سے ریفرنسز جمع کرائے ہوئے ہیں۔

ریفرنسز میں مؤقف پیش کیا گیا ہے کہ پارٹی کی جانب سے احکامات جاری کیے جانے کے باوجود اراکین نے خلاف ورزی کرتے ہوئے حمزہ شہباز کے حق میں ووٹ دیا۔