بلال یاسین قاتلانہ حملہ کیس میں عدالت نے مرکزی ملزم میاں حسیب وکی کی عبوری ضمانت کنفرم کردی۔ 

تفصیلات کے مطابق انسداد دہشت گردی کی عدالت لاہورنے مرکزی ملزم حسیب وکی کی عبوری ضمانت ایک لاکھ روپے کے مچلکوں کے عوض کنفرم کی۔

ملزم میاں حسیب وکی پر بلال یاسین پر قاتلانہ حملہ کرنے کا مقدمہ درج ہے۔

گذشتہ روز لاہور کی انسداد دہشت گردی کی عدالت نے لیگی رہنما بلال یاسین پر قاتلانہ حملہ کے مبینہ ماسٹر مائنڈ میاں حسیب وکی کی عبوری ضمانت میں آج 16 اپریل تک توسیع کرتے ہوئے فریقین سے حتمی دلائل طلب کیے تھے۔

انسداد دہشتگردی کی عدالت کے جج اعجازاحمد بٹر نے میاں حسیب وکی کی عبوری ضمانت کی درخواست پر سماعت کی تھی۔

ملزم نے اپنے وکیل میاں علی اشفاق اوررانا عبدالمعروف خان کے ہمراہ عدالت میں پیش ہو کر حاضری مکمل کروائی۔

ملزم کے وکیل نے عبوری ضمانت کنفرم کرنے کیلئے دلائل دیے جبکہ مدعی فریق نے مزید دلائل کے لیے مہلت طلب کی۔

عدالت نے ملزم حسب وکی کی عبوری ضمانت میں 16 اپریل تک توسیع کرتے ہوئے عبوری ضمانت پر فریقین سے حتمی دلائل طلب کیے۔

ملزم کے وکیل نے کہا ملزم حسیب وکی کو واقعہ کے بارہ دن بعد گواہ کے ضمنی بیان پرنامزد کیا گیا۔ میاں حسیب وکی سے بلال یاسین کے بہنوئی کی پرانی مقدمہ بازی چل رہی ہے۔

وکیل ملزم نے کہا کہ بد نیتی کی بنیاد پر مقدمہ میں ملوث کیا گیا میاں حسیب وکی کے والد اور بھائی سمیت دیگر ملزمان کی ضمانت منظور ہو چکی ہے۔