معروف بالی وڈ اداکار اجے دیوگن نے اپنا فون نمبر بار بار تبدیل کرنے کی وجہ بتا دی ہے۔

بھارتی میڈیا رپورٹ کے مطابق بالی ووڈ کے معروف اداکار اجے دیوگن کے بارے میں یہ مشہور ہے کہ وہ مسلسل اپنا فون نمبر تبدیل کرتے رہتے ہیں تاہم اب اداکار نے ایسا کرنے کی وجہ بھی بتا دی ہے۔

بھارتی میڈیا کا کہنا ہے کہ اجے دیوگن نے اپنے حالیہ انٹرویو میں بار بار فون نمبر بدلنے کی وجہ بتاتے ہوئے کہا کہ انہیں موبائل پر بات کرنے سے نفرت ہے اسی وجہ سے وہ فون سے دور رہتے ہیں۔

اجے نے کہا کہ میں مسلسل نمبر تبدیل کرتا ہوں تاکہ لوگ مجھ سے بار بار رابطہ نہ کر سکیں، کیوں کہ مجھے فون سے دور رہنا پسند ہے، جب تک کوئی بہت ہی ضروری کام نہ ہو کسی سے بھی کال پر بات نہیں کرتا۔

یہی نہیں بلکہ اجے کی طرح بالی ووڈ اسٹارز پریتی زنٹا اور پریانکا چوپڑا کی بھی فون نمبر تبدیل کرنے کی عادت ہے۔

خیال رہے کہ اجے دیوگن کا شمار بھارت کے ان اداکاروں میں ہوتا ہے جو اپنے کام میں بےحد سنجیدہ ہیں اور وہ مزاجی طور پر بھی سنجیدہ شخصیت کے مالک ہیں، اجے اپنے کام کے ساتھ صرف اپنے گھر والوں کو وقت دینا پسند کرتے ہیں۔

یاد رہے کہ اجے جلد اپنی نئی آنے والی فلم ’رن وے 34‘ میں جلوہ گر ہوں گے جبکہ وہ اس فلم کے پروڈیوسر اور ڈائریکٹر بھی ہیں۔