بھارت نے دعویٰ کیا ہے کہ اس نے متنازع علاقے لداخ میں بجلی کی ترسیل کے نظام پر چینی ہیکروں کے حملے کو ناکام بنا دیا ہے۔

غیر ملکی خبررساں ادارے کے مطابق بھارت کے وزیر توانائی آر کے سنگھ کا کہنا ہے کہ چینی ہیکرز نے دو دفعہ لداخ کے قریب بجلی کی ترسیل کے نظام کو نشانہ بنانے کی کوشش کی لیکن کامیاب نہ ہو سکے۔

بھارتی وزیر توانائی کا کہنا تھا کہ بھارت نے ایسے حملوں کے سدباب کے لیے دفاعی سسٹمز نصب کر رکھے ہیں۔

واضح رہے، نئی دہلی کے دعوے سے ایک روز قبل امریکہ کی ایک انٹیلی جنس فرم ریکارڈڈ فیوچر نے کہا تھا کہ مشتبہ چینی ہیکروں نے حالیہ مہینوں میں کم از کم سات دفعہ انڈیا کے توانائی کے انفراسٹرکچر کو نشانہ بنانے کی کوشش کی۔ان حملوں میں گرڈ کنٹرول کے آپریشنز اور بجلی کی ترسیل کے نظام کو نشانہ بنایا گیا۔ حملوں کا مرکز بھارت اور چین کے درمیان لداخ کا متنازع علاقہ تھا۔ انہوں نے اپنی رپورٹ شائع کرنے سے قبل ہی بھارتی حکام کو ان حملوں کے حوالے سے خبردار کر دیا تھا۔

دوسری جانب چینی وزارت خارجہ کے ترجمان نےبھارتی انفراسٹرکچر پر حملوں کی تردید کی ہے۔ بیجنگ میں ایک پریس بریفنگ کے دوران وزارت خارجہ کے ترجمان کا کہنا تھا کہ ہم قانون کے مطابق ہیکنگ کی تمام اقسام کی سختی سے مخالفت کرتے ہیں

ان کا مزید کہنا تھا کہ ہم اس طرح کی سرگرمیوں کی کبھی بھی حمایت یا حوصلہ افزائی نہیں کرتے۔