توقع ہے کہ پاکستان کرکٹ بورڈ (پی سی بی) پاکستان جونیئر لیگ پر پاکستان سپر لیگ (پی ایس ایل) کی فرنچائزز کے خدشات کو دور کرے گا۔

تفصیلات کے مطابق فرنچائز مالکان کو پی سی بی کے پاکستان جونیئر لیگ کے اقدام پر تحفظات تھے، جیسا کہ کرکٹ پاکستان نے رپورٹ کیا ہے۔

مالکان کا کہنا تھا کہ پی سی بی نے اس اعلان سے قبل انہیں اعتماد میں نہیں لیا تھا، ان کے مطابق پی ایس ایل کے متوازی کوئی اور لیگ اس کے امیج کو نقصان پہنچا سکتی ہے۔

پی سی بی کے ڈائریکٹر میڈیا سمیع الحسن برنی نے کہا ہے کہ پی سی بی جلد فرنچائز مالکان سے بات چیت کرے گا اور ان کے تمام تحفظات دور کرے گا۔ان کا کہنا تھا کہ یہ رائے کا معاملہ ہے اور پی سی بی فرنچائزز سے بات کرے گا تاکہ انہیں جے پی ایل اور ویمن لیگ کے فلسفے، پس منظر، فوائد اور مثبت پہلوؤں سے آگاہ کیا جا سکے۔

فرنچائزز نے پی سی بی سے پی ایس ایل کے پانچویں اور چھٹے ایڈیشن کے اکاؤنٹ کی تفصیلات بھی شیئر کرنے کو کہا ہے۔

اس معاملے پر سمیع الحسن  برنی نے کہا کہ پی سی بی نے پہلے ہی پی ایس ایل 5 اور 6 کی فرنچائزز کے ساتھ ایونٹ کی آمدنی سے متعلق تفصیلات شیئر کی ہیں۔

چیئرمین رمیز راجہ نے بتایا کہ ایک فرنچائز سے 90 کروڑ روپے کا منافع ہوا لیکن مالکان نے اس دعوے کو ٹھکرا دیا۔

سمیع نے  کہا کہ ایونٹ کے اخراجات پر، مصالحتی عمل میں 90 دن لگ سکتے ہیں کیونکہ مختلف انوائسز اور بلز جمع کرانا پڑتے ہیں،اس سلسلے میں، چند ٹیموں سے کچھ معلومات کا انتظار ہے۔

مالکان نے پی ایس ایل کے لیے ایک الگ کمپنی کا مطالبہ کیا جس میں مختلف اسٹاف اور انتظامیہ شامل ہو، سمیع نے بتایا کہ یہ بحث پچھلے چار سال سے جاری ہے لیکن ابھی تک کوئی فیصلہ نہیں ہوا ہے۔