خیبرپختونخوا فوڈ سیفٹی اتھارٹی نے پشاور میں جعلی مصالحہ جات کے خلاف بڑی کارروائی کی ہے۔

تفصیلات کے مطابق فوڈ سیفٹی اتھارٹی کی جانب سے چارسدہ روڈ اور بخشو پل کے قریب مصالحہ جات تیار کرنے والی فیکٹریز پر رات گئے چھاپے مارے گئے۔

کارروائی میں 2 مصالحہ جات یونٹس سے بھاری مقدار میں چوکر کی ملاوٹ پکڑی گئی جبکہ متعلقہ یونٹس سے 2000 کلو ملاوٹ شدہ مصالحہ جات اور چوکر کی بوریاں برآمد کرلی گئی ہیں۔

فوڈ سیفٹی اتھارٹی نے بتایا کہ یونٹس میں صفائی کی صورتحال بھی نہایت ناقص پائی گئی اور دونوں یونٹس کو سیل کردیا گیا۔

فوڈ سیفٹی اتھارٹی نے مزید کہا کہ یونٹس سے مضر صحت مصالحہ جات شہر کے مختلف حصوں میں سپلائی کئے جاتے تھے۔

اس حوالے سے ڈی جی فوڈ سیفٹی اتھارٹی شاہ رخ علی خان کا کہنا ہے کہ رمضان المبارک میں اشیاء خوردونوش کا معیار یقینی بنانے کے لئے فوڈ سیفٹی اتھارٹی بھر پور طریقے سے سرگرم ہے۔

ڈی جی فوڈ سیفٹی اتھارٹی نے مزید کہا کہ شہری اشیاء خوردونوش سے متعلق شکایت کی صورت میں ٹال فری پر رابطہ کریں۔

واضح رہے کہ کچھ روز قبل ہی خیبرپختونخوا فوڈ سیفٹی اتھارٹی کی جانب سے جعلی گڑ تیار کرنے والے یونٹ کے خلاف کی گئی کارروائی کے نتیجے  میں 1400 کلو چینی، خراب گڑ اور مضر رنگ  ضبط کرلیا گیا تھا۔

ڈی جی فوڈ سیفٹی اتھارٹی شاہ رخ علی خان کا کہنا تھا کہ یونٹ میں گنے کے بجائے چینی، خراب گڑ اور مضر صحت رنگوں کی مدد سے گڑ تیار کیا جارہا تھا۔

ڈی جی فوڈ سیفٹی اتھارٹی کے مطابق مارکیٹ میں صاف اور محفوظ خوراک کی فراہمی یقینی بنا رہے ہیں، عوام بھی ملاوٹ مافیا کے خلاف شکایات ہمارے ٹال فری نمبر پر درج کرائیں۔