ناصرحسین شاہ نے کراچی یونیورسٹی میں دھماکے پر اظہار افسوس کیا ہے۔

وزیر بلدیات سندھ ناصر حسین شاہ نے ٹوئٹر پر جاری ایک پیغام میں کہا ہے کہ کراچی یونیورسٹی میں ہونے والے دھماکے پر شدید افسوس ہے اور بھرپور مذمت کرتے ہیں۔

انہوں نے کہا کہ جاں بحق ہونے والوں کے لواحقین سے تعزیت کرتے ہیں، حقائق تک پہنچنے کے لیے اس سلسلے میں تحقیقات جاری ہیں۔

کراچی یونیورسٹی میں ہونے والے دھماکے پر شدید افسوس ہے اور بھرپور مذمت کرتے ہیں ۔ جاں بحق ہونے والوں کے لواحقین سے تعزیت کرتے ہیں ۔ حقائق تک پہنچنے کے لیے اس سلسلے میں تحقیقات جاری ہیں ۔

Advertisement

— Syed Nasir Hussain Shah (@SyedNasirHShah) April 26, 2022

واضح رہے کہ جامعہ کراچی میں غیر ملکی اساتذہ کی وین میں دھماکے کے نتیجے میں 5 افراد جاں بحق جب کہ متعدد زخمی ہوگئے ہیں۔

کراچی یونیورسٹی کے کامرس ڈیپارٹمنٹ اور کنفیوشس انسٹی ٹیوٹ آف چائنیز لنگویج کے قریب کھڑی ایک وین میں اس وقت دھماکا ہوا جب وہاں بڑی تعداد میں طلبہ اور اساتذہ موجود تھے۔

دھماکے کی شدت اس قدر زیادہ تھی کہ ناصرف وین میں آگ بھڑک اٹھی بلکہ اطراف میں کھڑی گاڑیوں اور عمارتوں کے شیشے ٹوٹ گئے۔

دھماکے کے فوری بعد جامعہ کراچی میں سیکیورٹی پر مامور قانون نافذ کرنے والے ادارے کے اہلکار پہنچ گئے۔

دھماکے کے نتیجے میں زخمی ہونے والوں کو فوری طور پر قریبی اسپتال منتتقل کردیا گیا جہاں 5 افراد کے جاں بحق ہونے کی تصدیق کی گئی ہے۔ زخمیوں میں سے کئی کی حالت تشویشناک بتائی جارہی ہے، جس سے جانی نقصان میں مزید اضافے کا اندیشہ ظاہر کیا جارہا ہے۔

کراچی پولیس چیف غلام نبی میمن نے میڈیا سے بات کرتے ہوئےکہا کہ دھماکا خودکش ہوسکتا ہے اور اس میں برقع پوش خاتون ملوث ہوسکتی ہے، دھماکا تخریب کاری کا نتیجہ ہے، چینی اساتذہ کونشانہ بنایاگیا۔

وزیراعلیٰ سندھ مراد علی شاہ نے گاڑی میں دھماکے کا نوٹس لے لیا اور کمشنر کراچی سے تفصیلی رپورٹ طلب کرلی ہے۔

ڈی آئی جی ایسٹ مقدس حیدر نے میڈیا سے گفتگو کرتے ہوئے کہا ہے کہ دھماکا ایک بج کر 52 منٹ پر ہوا، دھماکے میں 5 افراد جاں بحق ہوئے جن میں تین غیر ملکی باشندے شامل ہیں۔

انہوں نے کہا کہ جاں بحق افراد میں غیر ملکیوں میں دو خاتون  ایک مرد شامل ہے، دھماکے کا تعین بم ڈسپوزیبل اسکاڈ نے کرنا ہے۔