پیک مین ویڈیو گیم کی دنیا کا مقبول ترین گیم بھی ہے لیکن اس کا خاص سافٹ ویئر کچھ اس طرح لکھا گیا ہے کہ یہ گیم ہر اگلے مرحلے پر مشکل سے مشکل تر ہوتا چلاجاتا ہے۔ اب تک دس افراد ہی اس پر موزوں ترین اسکور کرکے سارے راؤنڈ عبور کرچکے تھے لیکن اب ایک اور امریکی نے یہ اعزاز حاصل کرکے پوری دنیا کے گیارہ افراد میں اپنا نام درج کروالیا ہے۔

پینسلوانیا کے جیک گولڈ برگ نے کلاسیکل آرکیڈ گیم پر اپنی مہارت کا بے مثال مظاہرہ کیا ہے۔ اس میں انہوں ںے چار گھنٹے اور گیارہ منٹ میں تمام 256 راؤنڈ مکمل کئے ہیں اور 3333360 اسکور بنایا ہے جو اس گیم پر سب  سے زیادہ ممکن اسکور کا ایک ریکارڈ بھی ہے۔

ویڈیو گیم کے آرکیڈ ورژن پر ریکارڈ رکھنے والی ایک کمپنی ٹوئن گیکسیز نے اس کی تصدیق بھی کی ہے۔ کمپنی نے جیک کو مبارکباد دیتے ہوئے کہا ہے کہ وہ دنیا کے گیارہویں شخص ہیں جنہوں نے 1980 کے مشہور آرکیڈ گیم میں آخری حد تک جاکر سب سے زیادہ اسکور کیا ہے اور اس کے سینکڑوں درجے پار کئے ہیں۔

جیک گولڈ برگ نے اس پر خوشی کا اظہار کرتے ہوئے کہا ہے کہ وہ بہت پرامید ہیں۔ انہوں نے بتایا کہ وہ مشہور آرکیڈ گیم گیلگا میں آخری حد تک جاکر ایک اور ریکارڈ بنانا چاہتے ہیں اور یہ اعزاز دنیا میں اب تک صرف 16 گیمرز کو ہی حاصل ہوسکا ہے۔