ٹوبہ ٹیک سنگھ میں تنخواہیں نہ ملنے پر ریلوے ملازمین سراپا احتجاج ہیں۔

تفصیلات کے مطابق احتجاج میں اسٹیشن ماسٹر سمیت ریلوے ملازمین کی بڑی تعداد نے شرکت کی ہے۔

ریلوے ملازمین کا کہنا ہے کہ عید میں چند روز باقی ہیں لیکن ہمیں تنخواہیں نہیں ملیں، راشن اور عید کی شاپنگ کیسے کریں۔

ریلوے ملازمین نے وزیر اعظم سے فوری تنخوائیں جاری کرنے کا مطالبہ کرتے ہوئے مزید کہا کہ دیگر محکموں کی طرح ہمیں بھی تنخوائیں دیں جائیں۔

 خیال رہے کہ پاکستان ریلوے نے عید الفطر کے موقع پر کوئٹہ سے اسپیشل عید ٹرین چلانے کا فیصلہ کیا ہے۔

ریلوے حکام کے مطابق عید اسپیشل ٹرین کل کوئٹہ سے روانہ ہوگی جبکہ یہ ٹرین دس بوگیوں میں مشتمل ہوگی۔

ریلوے حکام نے بتایا کہ عید اسپیشل ٹرین کل صبح 10 بجے کوئٹہ سے روانہ ہو کر راولپنڈی تک جائے گی۔

ریلوے حکام کا کہنا ہے کہ اسپیشل ٹرین میں ساڑھے 6 سو مسافروں کی گنجائش ہوگی۔

واضح رہے کہ پاکستان ریلوے نے عید الفطر کے موقع پر کراچی سے 2 اسپیشل ٹرینیں چلانے کا اعلان کر دیا تھا۔

 ایک اسپیشل ٹرین کراچی سے لاہور اور دوسری کراچی سے پشاور کے لیے روانہ ہوگی۔

عید اسپیشل کی پہلی ٹرین 29 اپریل کو کراچی  سے پشاور کے لیے دن ڈھائی بجے کراچی سٹی سے روانہ ہو گی، کراچی سے پشاور روانہ ہونے والی عید اسپیشل ٹرین 14 کوچز پر مشتمل ہوگی اور تمام کوچز اکانومی کلاس ہوں گی۔